Mánerlep syrǵanaýdan Horvatııanyń astanasy Zagrebte uıymdastyrylǵan «Chelendjer» sanatyndaǵy Golden Spin týrnırinde Mıhaıl Shadorov tabysty óner kórsetti.
Qysqa baǵdarlamany jerlesimiz úshinshi orynmen qorytyndylady. 82,85 upaı jıǵan Mıhaıl jattyǵýdyń bul túrinde álem chempıonatynyń eki dúrkin qola júldegeri, «Tórt qurlyq birinshiliginiń» jeńimpazy, qytaılyq Szın Boıan (91,25 upaı) men estonııalyq Aleksandr Selevkodan (83,58) ǵana qalyp qoıdy. Erkin baǵdarlamada 19 jastaǵy Qazaqstannyń óreni ekinshi orynǵa (152,47) taban tiredi. Jarys qorytyndysy boıynsha ol kúmis medaldy ıelense, joǵaryda esimi atalǵan Baltyq jaǵalaýynyń ókili qola júldeni qanaǵat tutty. Al Qytaı eliniń ataqty mánerlep syrǵanaýshysy altyn tuǵyrǵa kóterildi.
Sóıtip, Mıhaıl Shadorov bıylǵy maýsymda óziniń ekinshi júldesine qol jetkizdi. Osydan bir aı buryn ǵana ol Qytaıdyń Chýnsın qalasynda ótken Gran-prı dodasynda úshinshi satyǵa jaıǵasqan edi.