11 qarashada shamamen 12:36-da Qostanaı qalasyna qarasty Amangeldi eldi mekeninde «KamazSentr» mekemesi jalǵa alyp otyrǵan júk kólikterin jóndeý beketinde gaz jarylyp, aýdany 280 sharshy metrlik ǵımarattyń ishindegi dúnıeniń bári qırap, qulaǵan. Jarylys kezinde ǵımarat ishinde bolǵan adamdardyń birazy qırandy astynda qalǵan, dep jazady Egemen.kz.
Oqıǵa ornynda qutqarý-izdestirý sharalary júrip jatyr. Apat basynda júrgen oblystyq Tótenshe jaǵdaı departamentiniń basshysy, polkovnık Qasym Qaırattyń aıtýynsha, 10 adam jaryqshaqtan jaraqat alǵan. Buǵan deıin qutqarýshylardyń qırandy astynan úsh adamdy alyp shyqqanyn habarlaǵan bolatynbyz. Bir adamnyń jaǵdaıy aýyr. Dárigerler 13 adamǵa medısınalyq kómek kórsetken. Olardyń ekeýi úılerine jiberilgen. 7 adam aýrýhanada jatyr.
«Jumys berýshiniń tizimi boıynsha, áli úsh adam qırandy astynda bolýy múmkin. Biraq jarylys kezinde ǵımaratta bul mekemege qatysy joq qansha adam bolǵany belgisiz. Qazir qutqarý-izdeý sharalary jalǵasyp jatyr. Izdeý jumystaryna saqyldaǵan sary aıaz ben sýyq jel, ǵımarat súıekteriniń aýyrlyǵy jáne mekeme aýmaǵyndaǵy qıraǵan tehnıkanyń kóptigi qıyndyq týǵyzyp jatyr. Aýladaǵy tehnıkanyń birazy shyǵarylyp, tazartý jumystary júrgizildi. Asa saqtyqpen qımyldaýǵa týra kelip jatyr. Bir tehnıkany shyǵaramyz dep, úıindi astynda jatqan adamǵa zııan keltirip alý qaýpi joǵary. Jarylystyń neden bolǵany tergeý barysynda anyqtalady. Boljam boıynsha, gaz jarylýy múmkin», dedi oblystyq TJD basshysy.
Jedel medısınalyq kómek kórsetý qyzmetiniń málimetinshe, jarylystan zardap shekken 4 adam Qostanaı oblystyq aýrýhanasyna, 7 adam qalalyq aýrýhanaǵa jetkizilgen. Deni – orta dárejedegi jaraqat alǵandar. Birinshi tabylǵan 40 jas shamasyndaǵy er adam aýyr jaǵdaıda qalalyq aýrýhanaǵa jetkizilgen. Dárigerlerdiń aıtýynsha, jábirlenýshi mıynan jaraqat alǵan. Qazir medısınalyq tekserý sharalary júrip jatyr.
«Qazir taǵy bir adamnyń denesin alyp shyǵýǵa tyrysyp jatyrmyz. Odan bólek taǵy eki adam jatýy múmkin. Mynadaı aıazda qırandy astyndaǵy adamdardyń tiri qalýy endi qıyn», dedi polkovnık Qasym Qaırat.
Qutqarý sharalaryna 200-deı adam, 39 tehnıka qatysyp jatyr. Olardyń ishinde qutqarýshylar, dárigerler, jergilikti atqarýshy organ ókilderi, kommýnaldyq, ınjenerlik qyzmet jumysshylary, volonterler bar.
TJD basshysynyń aıtýynsha, qutqarýshylar qırandy astynan alyp shyqqan ekinshi adam qalǵan úsh adamnyń shamamen qaı tusta jatqanyn kórsetken. Polısııa jasaǵyndaǵy qyzmettik ıt te sol jerde aınalshyqtap júrip alǵan. Qazir sol tusta arshý jumystary júrip jatyr.