Aralas jekpe-jekten AQSh-tyń UFC promoýsheninde kúsh synasyp júrgen Azat Maqsum kelesi kezdesýin 4 aqpanynda Las-Vegasta ótkizedi.
Qandasymyzdyń qarsylasy – Neıt Menes. Amerıkalyq faıterdiń jasy 32-de. Sporttyq mansabyn osydan týra 10 jyl buryn bastaǵan ol sol ýaqyttan beri 20 márte aıqas alańyna shyqty. Alǵashqy 12 kezdesýde jeńiske jetti. 2019 jyldyń mamyr aıynda fransııalyq Telor Lepılýstan taıaq jedi. Arada týra bir jyl ótkennen soń óziniń otandasy Kelen Van Kampty nokaýtpen utty. Osy jarqyn jeńisinen keıin UFC-men kelisimshartqa otyrdy. Ataqty promoýshenniń týy astynda 9 márte óner kórsetip, 7 ret jeńiske jetti. Neıt tek Reseıdiń namysyn qorǵap júrgen daǵystandyq Ýmar Nurmaǵambetov pen Tagır Ýlanbekovke ese jiberdi.
Azat Maqsum UFC-de bir ǵana kezdesý ótkizdi. Bıyl jazda ol Las-Vegasta amerıkalyq Taıson Nemnan aılasyn asyrdy. Al aralas-jekpe-jekten ótken jarystarda uzyn sany 17 ret óner kórsetken 28 jastaǵy qazaq faıteri sol básekelerdiń barlyǵyn óz paıdasyna sheshti. 12 aıqasta Azat aıqyn basymdyq tanytty.