Belgili estrada ánshisi, kompozıtor Álı Oqapov anasy, Halyq ártisi Roza Rymbaeva týraly fılm túsire bastaǵanyn málimdedi, dep habarlaıdy Egemen.kz.
Kıno kartınada óner ıesiniń ómir jolynda eki ret qastandyq qurbany bola jazdaǵany da qamtylady.
“Revıý” baǵdarlamasyna qonaq bolǵan Álı Tastanuly fılm túsirýdi osydan úsh jyl buryn qolǵa alǵanyn atap ótken. Alaıda, onyń shyǵarmashylyǵyna kedergiler kóp kezdesip jatqan kórinedi.
«Úsh jyl qatarynan ótpeı qalyp jatyrmyz. О́ıtkeni, eksperttik komıssııa músheleri bar jáne olardyń sýbektıv kózqarasy boıynsha sheshim qabyldanady. Sol sheshimge baılanysty qoldaý kórsetiledi. Jyldan-jylǵa sharshamaı, sol "Roza" atty papkamdy kóterip, keıbir adamnyń kózine kúıik bolsam da, jyl saıyn usynamyn», dedi ol.
Sondaı-aq halyq ártisiniń keıbir áriptesteri de fılmdi jaryqqa shyǵarýǵa qarsy bolyp jatyr.
“Menimen kelispeıtin adam kóp. Osy kınoǵa qarsy shyqqan jandar da bar. Eń qyzyǵy, anamnyń sahnalas áriptesteri men óner maıtalmandary da bar. Olardyń óz jospary bar shyǵar, biz sol josparǵa saı kelmeıtin shyǵarmyz dep oılaımyn. Biraq men jeńilmeımin, toqtamaımyn", deıdi Álı Oqapov.
Sonymen qatar ánshi anasyna jasalǵan qastandyqtyń artynda kim turǵanyn áli kúnge deıin bile almaı keledi. Aıtýynsha, óner juldyzy eki ret ólim aýzynan qalǵan.
«Eki ret anamyz ólip qala jazdaǵan. Ony kóbi bilmeıdi. Keńes úkimetiniń ydyraýy, 90-jyldar bar, sodan keıin meniń dúnıege kelgenim bar, Mádıdiń dúnıege kelgeni bar, ákemizdiń qaıtys bolǵany bar, túrli-túrli básekelesteriniń jaǵymsyz qadamy anyq kórsetiledi. Ár kórinis anamnyń ómirinen alynǵan», deıdi ánshi.