Qonaev qalasynda kóz jumǵan sarbazdyń anasy Tolqyn Ǵalymova bıylǵy 7 qarashada oryn alǵan qaıǵyly oqıǵany esine aldy, dep habarlaıdy Egemen.kz.
Onyń uly Qonaevtaǵy áskerı bólimde óz-ózine qol jumsaǵan.
Mgorod.kz-tyń jazýynsha, áıeldiń uly Arsen Ishanovtyń qaza tapqanyna bir aı boldy.
"Janymdy qoıarǵa jer tappaımyn. Ol 2003 jyly dúnıege kelgen. Ekinshi balam edi, jalpy tórt balam bar. Balalardy jalǵyz tárbıelep otyrmyn, olardyń ákesi 2014 jyly jol apatynan qaıtys boldy", - deıdi Tolqyn Ǵalymova.
Marqumnyń anasynyń sózine qaraǵanda, uly Jáńgir han atyndaǵy BQATÝ-da "qaýipsizdik tehnıkasy" mamandyǵy boıynsha joǵary bilim alǵan. Ol pánderdiń birinen emtıhan tapsyra almaı, keıin oqýyn tastap ketipti. Áskerı komıssarıatta oqymaıdy dep tirkelgen. Kóp uzamaı oǵan shaqyrý kelgen. Jigit medısınalyq komıssııadan ótip, bıyl sáýirde qyzmet etýge shaqyrylǵan.
"Arsen áýe-desant áskerine jazyldy. Bul qıyn ekenin aıttym. Biraq ol áýe kúshterin elıtalyq ásker dep sanady da, aıtqanynan qaıtpady. 4 sáýirde tańerteń ulymdy poıyzǵa shyǵaryp saldym. Mamyrda oǵan Almatyǵa ant berý rásimine bardym. Sonda ony tanymadym, ózin óte birtúrli ustady... kózime qaramady. Men odan ne bolǵanyn suradym. Qatty ýaıymdadym. Ol ketip bara jatyp, maǵan eshteńe aıta almaıtynyn jetkizdi, bul er adamdardyń tirligi ekenin aıtty. Keıin men de ketip qaldym", - deıdi Tolqyn.
Áıel ulymen telefon arqyly sóılesip turǵanyn aıtady. Ýaqyt óte kele Arsen odan aqsha suraı bastapty. Ol anasyna ártúrli nómirlerden qońyraý shalyp, SIM kartasy men batareıasyn urlatyp alǵanyn da aıtypty.
"Qaı nómirden qońyraý shalsa, soǵan aqsha aýdardym. Birte-birte somalar ósti. Ol aqshany qaıda jumsaıtynyn suradym. Ol ystyqta dúkennen sýsyndar satyp alatynyn, jigittermen birge doner, pıssalarǵa tapsyrys beretinin aıtty. Keıinirek onyń ápkesinen de jıi aqsha suraıtynyn bildim. Ishteı ýaıym boldy. Qasynda boryshyn ótep júrgenderdiń ata-anasynan aqsha máselesi týraly surady. Olar da solaı jiberetinderin aıtty. Sonda ǵana tynyshtalyp, odan keıin de aqsha jiberdim", - dep esine aldy áıel.
7 qarashada komandır áıelge uly qaıtys bolǵanyn habarlaǵan.
"Ulyńyz túski as kezinde boksta jumys istep jatyp, áskerı kóliktiń artyna shynjyrǵa asylyp qaldy" dedi. Men qatty jylaı bastadym. Estigen nársemnen esimnen tanyp qaldym. Eki kún tura almadym", - deıdi marqumnyń anasy.
Saraptamadan keıin Arsenniń denesi Oralǵa ushaqpen jetkizilipti.
"Ol qujattamamen jumys istep júrip, qaıǵyly oqıǵa bolǵan kúni boksqa suranypty. Ol sol jerde birdeńe boıap júrgen, qolynda boıaýdyń izderi qalǵan. Denesinde soqqy izderi bolǵan joq. Tamaǵynda asylǵan iz qaldy", - deıdi marqumnyń anasy.
Áıel 2 qarashada ulymen sońǵy ret telefon arqyly sóıleskenin esine aldy. Ol ulyna psıhologııalyq qysym jasaldy dep sanaıdy. Marqumnyń anasynyń pikirinshe, uly mundaı qadamǵa aqsha taba almaǵandyqtan bardy.
"Áskerge deni saý balamdy berip edim, denesin qaıtaryp berdi. Bul úshin kim jaýap beredi? Biz memleketke sendik. Eger balanyń jaǵdaıy durys emes ekenin kórse, nege psıhologtar sóılespedi? Bólim komandırleri qaıda? Nelikten áskerde mundaı jaǵdaılar bolyp jatyr? Ulym óte jaýapty, sabyrly edi, jaqsy oqydy. Áskerden qansha ana balasynyń tabytyn qushady? Men de osyndaı analardyń qatarynda bolyp otyrmyn", - deıdi áıel.
Arsenniń anasy bul derek boıynsha qylmystyq is qozǵalǵanyn qalaıdy ári ulynyń qandaı sebeppen sýısıd jasaǵanyn bilgisi keledi.