10 jeltoqsannan bastap elimizdiń basym bóliginde qolaısyz aýa raıy, keıbir óńirlerde ekstremaldy jaǵdaılar baıqalǵany belgili. Polisia.kz-tiń málim etýinshe trassalarda polısııa qyzmetkerleri kúsheıtilgen tártippen qyzmet etip, keıbir aımaqtardyń joldarynda patrýldik ekıpajdar sany 2-3 ese kóbeıtilgen, dep habarlaıdy Egemen.kz.
«QazAvtoJol» men polısııanyń eskertýleri bolsa da, keıbir júrgizýshiler trassalarǵa shyǵyp ketip, polıseılerdiń járdemimen ǵana qaıǵyly oqıǵalardyń aldyn alǵan jaǵdaılar da oryn aldy. 12 oblysta halyqaralyq, respýblıkalyq, jergilikti mańyzy bar joldardan barlyǵy 100-den astam ýchaskeler jabyldy. Jumys istep jatqan jylytý pýnkteriniń sany – 500.
Joldarda sýyqta qalǵan 1012 adam qutqaryldy, onyń ishinde 25 bala bar. 1100 júrgizýshige járdem jasalǵan. Ekıpajdaǵylardyń barlyǵy alǵashqy medısınalyq kómek kórsetý daǵdylaryn meńgergen jáne ár ekıpajda arnaıy dári-dármek qobdıshasy bar.
Negizinen saqshylar jolda qalǵan azamattardyń kólik janarmaıyn jylytýǵa, buzylǵan kólikti jóndeýge, jylytý pýnktterine evakýasııalaýǵa járdemdesti jáne tizbektelgen avtokólikterdi alyp júrdi. Kóptegen júrgizýshiler men jolaýshylar polıseılerge rızashylyqtaryn bildirip, olardyń eskertýlerine qulaq asýǵa keńes berdi.