Astanadaǵy Jaqsylyq Úshkempirov atyndaǵy jekpe-jek saraıynda qazaq kúresinen «Dala qyrandary» respýblıkalyq týrnıri ótti.
Jyl boıy uıymdastyrylǵan túrli jarystyń qorytyndysy boıynsha iriktelinip alynǵan elimizdiń eń úzdik 64 apaıtósi elorda tórinde óner kórsetti. Olar 8 salmaq dárejesiniń júldelerin sarapqa saldy. Bozkilemde beldesken balýandar arasynda soltústikqazaqstandyq Erkebulan Qalymbekov (55 kg) pen Qaıyrbek Batyrhan (74 kg), astanalyq Erjan Erenqaıypov (60 kg), jetisýlyq Ákejan Bilálov (66 kg), qaraǵandylyq Zańǵar Marat (82 kg), qyzylordalyq Eńbek Saqtaǵanov (90 kg), shymkenttik Nursultan Muzapparov (100 kg) jáne mańǵystaýlyq Nurdáýlet Jarylǵapovtyń (+100 kg) shoqtyǵy bıik boldy.
Jeńis tuǵyrynyń eń bıik satysyna kóterilgen sańlaqtardyń barlyǵy da «Dala qyrandary» ataǵyna ıe boldy. Kelesi jyly bul balýandar halyqaralyq dodalarda el namysyn qorǵaıdy.