Muhıttyń arǵy jaǵalaýyndaǵy elderge bilim izdep baryp, jumys istep júrgen qazaq jastary az emes. Shetelde eldiń abyroıyn asyrǵandar ishinde atyraýlyq Ásel Kóptileýova da bar. Onyń AQSh-qa barǵanyna 20 jylǵa jýyqtaǵan.
Onyń aıtýynsha, 14 jyl Nıý-Iork qalasynyń turǵyny bolǵan. Eki jyldan beri Los-Andjeles shaharynda turady. Kásibin kınematografııamen baılanystyryp júr. Jaqynda ol «Miss Asia USA» baıqaýynda baq synady.
«Bul baıqaý AQSh-ta 35 jyldan ótip keledi. Kıno túsirýdiń qyr-syryn zerttep júrmin. Teatrda jumys isteımin. Kınofestıvaldiń birinde meni atalǵan baıqaýǵa qatysýǵa shaqyrdy. Bıyl baıqaýǵa qatysý úshin shyǵynnyń bárin ózim kóterdim. Ustazym Aınur Amangeldiqyzy men qurbym Ásel Abdrahmanovanyń zor qoldaýyn sezindim», deıdi Ásel Kóptileýova.
AQSh-taǵy sulýlar baıqaýynyń qazylar alqasy Ásel Kóptileýovanyń sahna mádenıetin meńgergenine, ónerine tánti bolǵan. Úmitkerlerdiń arasynan ony «Miss Asia USA» atalymyna laıyq dep tapty.
Atyraý oblysy