Májilistegi saýda saıasatyn damytýǵa arnalǵan Úkimet saǵatynda Saýda jáne ıntegrasııa mınıstri Arman Shaqqalıev áleýmettik mańyzy bar azyq-túlik taýarlarynyń baǵasyn retteý men memleket tarapynan shekti baǵa qoıý jaıyn baıandap berdi. Mınıstr áleýmettik mańyzy bar taýarlardyń baǵasyna baqylaý Aýyl sharýashylyǵy mınıstrligi, monopolııaǵa qarsy organ, ákimdikter, Azyq-túlik korporasııasy jáne turaqtandyrý qorlarymen birlesip keshendi sıpatta júrgizip jatqanyn aıtty, dep jazady Egemen.kz.
Arman Shaqqalıev turaqtandyrý qorlarynyń qyzmeti qaıta formattalyp, halyqqa naryqtaǵy baǵadan arzan taýar usyný úshin 2023 jyly 5 myńnan astam jármeńke uıymdastyrylǵanyn aıtty.
Halyq kóp tutynatyn taýarlardyń quny óspeý úshin «Azyq-túlik korporasııasynyń» turaqtandyrýshy róli keńeıtilip jatqanyn túsindirdi. Ol saýdadaǵy tıimsiz deldaldardy joıý jáne zańnamanyń talaptaryn saqtaý úshin óńirlik komıssııalardyń baqylaý qyzmeti qurylǵanyn jetkizdi.
Mınıstrlik Prezıdenttiń áleýmettik taýarlar baǵasyn memlekettik retteýden kezeń-kezeńimen bas tartý jónindegi tapsyrmasyn oryndaı bastaǵan.
«Retteý eki kezeńde júzege asyrylady.
- 2024 jyldyń 1-shi jartyjyldyǵynan bastap 100%-ǵa otandyq óndiris (tuz, un, rojkı, qaraqumyq jarmasy, kúrish, nan, sút, kartop, jumyrtqa) 9 taýarǵa shekti jáne shekti ruqsat etilgen baǵalardy belgileýden bas tartý usynylady;
- qalǵan 10 taýar boıynsha baǵany retteýden bas tartý 2025 jyldyń sońyna deıin aıaqtalady (sábiz, pııaz, qyryqqabat, kúnbaǵys maıy, sıyr eti, taýyq eti, aıran, maı, súzbe, qant)», dedi Arman Shaqqalıev.
Demek 2024-2025 jyldardan bastap joǵaryda atalǵan ónimderge shekti baǵa qoıylmaıdy. Bul otandyq taýar óndirisin toqyraýdan saqtaıdy dep túsindirdi ol.