Memleket basshysy Qasym-Jomart Toqaev «Egemen Qazaqstan» gazetine bergen suhbatynda 2024 jyly elimizdiń aldynda qandaı mindetter turǵanyn aıtty, dep habarlaıdy Egemen.kz.
«Men ótken qyrkúıektegi Joldaýymda jańa ekonomıkalyq úlgige kóshetinimizdi aıttym, 2029 jylǵa qaraı jalpy ishki ónimdi qazirgiden eki esege arttyrý máselesin basty strategııalyq maqsat retinde belgiledim. Kóp uzamaı Úkimettiń keńeıtilgen otyrysy ótedi. Onda elimizdiń byltyrǵy áleýmettik-ekonomıkalyq damý qorytyndysy shyǵarylyp, aldaǵy jumystyń amal-tásilderi aıqyndalady», dedi Prezıdent.
Budan soń ol Ulttyq quryltaıdyń otyrystary ıdeologııa salasyndaǵy máselelerdi, ulttyń jańa sapasyn qalyptastyrý isin, qoǵamnyń qundylyqtar júıesin jańǵyrtý jaıyn talqylaıtyn tıimdi pikirtalas ornyna aınalǵanyn aıtty. Buǵan deıin jazdygúni shaqyrylyp kele jatqan Quryltaıdyń otyrysy bıyl kóktemde ótetinin málim qyldy. Osylaısha, bıyl ekonomıkalyq, qoǵamdyq-saıası jáne gýmanıtarlyq salalarda atqarylatyn jumystyń negizgi baǵyt-baǵdary birinshi toqsanda-aq aıqyndalady.
«Biz ult múddesin eskere otyryp, syndarly ári salıqaly syrtqy saıasatty jalǵastyramyz. 2024 jyly elimizde birqatar aýqymdy sammıt, forýmdar ótedi. Qazaqstan birneshe bedeldi halyqaralyq uıymǵa, atap aıtsaq, Shanhaı yntymaqtastyq uıymyna, Ujymdyq qaýipsizdik týraly shart uıymyna, Azııadaǵy ózara is-qımyl jáne senim sharalary jónindegi keńeske, Túrki memleketteri uıymyna, Araldy qutqarý halyqaralyq qoryna, Azyq-túlik qaýipsizdigi jónindegi ıslam uıymyna tóraǵalyq etedi.
Dúnıejúzilik kóshpendiler oıynyn ótkizý de elimiz úshin aıtýly oqıǵa bolmaq. Baıraqty báseke ulttyq sport pen salamatty ómir saltyn dáripteý jaǵynan da, Uly daladaǵy kóshpendiler órkenıetiniń murageri sanalatyn baýyrlas halyqtardyń mádenı-gýmanıtarlyq baılanysyn arttyrý turǵysynan da mańyzdy ekeni sózsiz», dedi Qasym-Jomart Toqaev.
Sondaı-aq Memleket basshysy el tarıhynda erekshe orny bar tulǵalarǵa qurmet kórsetý dástúri jalǵasatynyn sóz etti.
«Bıyl áıgili ǵalym Qanysh Sátbaevtyń týǵanyna 125, dańqty batyrlar Saǵadat Nurmaǵambetov pen Raqymjan Qoshqarbaevtyń týǵanyna 100 jyl tolady. Sonymen qatar tarıhshylardyń paıymdaýynsha, Joshy ulysynyń irgesi qalanǵanyna – 800 jyl. Memlekettiligimizdiń tamyry tym tereńde jatqanyn áıgileıtin osy aıtýly dataǵa oraı keń aýqymdy zertteýler qolǵa alynady. Bıyl Qazaqstan tarıhynyń kóptomdyǵyn ázirleý jumystaryn da aıaqtaımyz. Bul – ózimizden 200-den astam, shetelden 60-qa jýyq maman jumyldyrylyp, tyńǵylyqty jasalyp jatqan úlken sharýa.
Osyndaı mańyzdy oqıǵalardan bólek, kúndelikti atqarylýǵa tıis jumystar da az emes. Bul jyldyń el tarıhynda qandaı oryn alatyny barsha azamatymyzdyń erik-jigerine de baılanysty. Men jańajyldyq quttyqtaýymda bıyl bárimiz tutas ulttyń ósip-órkendeýine kýá bolatynymyzdy aıttym. Biraq osy maqsatqa jetý úshin biz bir el bolyp, bilek sybana jumys isteýimiz kerek», dedi ol.