Jylyoı aýdanynyń ortalyǵy Qulsary qalasynda «Nurly jer» memlekettik baǵdarlamasymen salynǵan jańa turǵyn úı kesheni paıdalanýǵa berildi. Jańa baspanadan monoqalada turatyn 300 otbasyna páter berildi.
Jańa turǵyn úıler «Atyraý» shaǵyn aýdanynda boı kótergen. Alaıda oblys ákimi Serik Shápkenovtiń aıtýynsha, onyń qurylysy birazǵa sozylǵan.
«Bul turǵyn úı kesheni qurylysynyń sapasy men merzimine qatysty másele kóp bolýyna baılanysty jaǵdaımen jeke tanysýdy jón kórdim. Jylyoı aýdanyna kelgen saparymnyń birinde turǵyndar qurylystyń uzaqqa sozylǵanyna renishin bildirgen edi. Sodan keıin qurylysty tezirek aıaqtaý úshin tıisti is-sharalar qolǵa alyndy. Qazir oıyn alańdary, jaıaý júrginshiler jáne kólik, turaq sekildi ınfraqurylym jelisi tolyǵymen daıyndaldy», dedi Serik Shápkenov.
Ákimniń pikirinshe, endi páter ıeleri kooperatıvin qurý, turǵyndarǵa quqyqtyq kómek kórsetý qajet. Beınebaqylaý kameralarynyń sany kóbeıtiledi.
Turǵyn úıden páter alǵandar qatarynda kópbalaly ana Quralaı Qorazova da bar. Ol úsh bólmeli páterdiń kiltin alýdy bes jyl kútken.
«On jyldan beri úı jaldaımyn. Bes jyl buryn kezekke turǵan edim. Endi mine, jańa páterge ıe boldym. Munda barlyq qajetti jaǵdaıdyń jasalǵanyna qýanyp turmyn», deıdi Quralaı Qorazova.
Jylyoı aýdanynyń ákimi Jumabek Qarajanovtyń málimetine súıensek, turǵyn úı kesheniniń jalpy aýmaǵy – shamamen 6,5 myń sharshy metr. Ár úıde – 100, onyń ishinde bir bólmeli – 25, eki bólmeli – 50 páter jáne úsh bólmeli 25 páter bar.
«Eki, úsh bólmeli páterler 225 kópbalaly otbasyna, bir bólmeli páterler ata-anasynyń qamqorlyǵynsyz qalǵan 15 balaǵa berildi. Jańa úılerden birinshi jáne ekinshi toptaǵy múgedekter, múmkindigi shekteýli balalardy tárbıelep otyrǵan otbasylar, zeınetkerler, sozylmaly aýrýlary bar turǵyndar, tolyq emes otbasy sanatynyń árqaısysyna 13 páterden bólindi. Al jaýyngerlik urys is-qımylyna qatysqan úsh ardager de jańa baspanaǵa ıe boldy», dedi Jumabek Qarajanov.
Atyraý oblysy