Búgin Senat Tóraǵasy Máýlen Áshimbaev Atyraý oblysyndaǵy máslıhattar depýtattarymen, jurtshylyqpen, aqsaqaldarmen jáne jastarmen kezdesti, dep habarlaıdy Egemen.kz.
Máýlen Áshimbaevtyń aıtýynsha, Senattyń máslıhattarmen birlesken jumysyndaǵy negizgi baǵytynyń birine Prezıdent Qasym-Jomart Toqaevtyń bastamasymen júzege asyrylyp jatqan reformalardy zańnamalyq qamtamasyz etý jáne óńirlerdi damytýǵa járdemdesý jatady.
Senat Tóraǵasy Memleket basshysynyń «Egemen Qazaqstan» gazetine bergen suhbatynda qamtylǵan mindetterge nazar aýdardy.
«Prezıdentimiz Qasym-Jomart Toqaev suhbatynda demokratııalyq reformalardyń júıeli ǵana emes, eshqashan keri qaıtpaıtyn túbegeıli sıpatqa ıe bolǵanyn qadap aıtty. Jalpy, ótken jyly azamattarymyzdyń konstıtýsııalyq quqyǵynyń qorǵalýyna kepil bolatyn joǵarǵy organ – Konstıtýsııalyq Sot jumysyn bastady. Alǵash ret azamattarymyz aýdan jáne oblystyq mańyzy bar qala ákimderin tikeleı saılady. Osy jáne ózge de jetistikter men bastamalar osy jyly da joǵary kórsetkishterge qol jetkizýimizge berik negiz bolady dep senemiz. Qazir elimizdiń aldynda aýqymdy maqsattar tur. Bul maqsattarǵa birlesip áreket etkende ǵana jetetinimiz sózsiz», dedi Senat Tóraǵasy.
Onyń pikirinshe, Senat pen máslıhattardyń ózara is-qımylynyń mańyzdy baǵyty – zańdardyń, ulttyq baǵdarlamalar men jobalardy óńirlerde iske asyrý sapasyna monıtorıng júrgizý. Osy oraıda jergilikti jerde problemalar anyqtalsa, qalalar men aýyldardyń erekshelikterin eskeriledi.
«Atyraý oblysy shetel ınvestısııasyn tartý boıynsha kósh bastap tur. О́nerkásip óniminiń kólemi ulǵaıyp keledi. Aımaqtaǵy shaǵyn jáne orta kásipkerlik sýbektileri sany ósti. Degenmen, sheshimin kútken máseleler joq emes. Turǵyndardy ekologııa, onyń ishinde aýanyń lastanýy jáne sý máselesi alańdatatynyn bilemiz. Injenerlik jáne energetıkalyq ınfraqurylymdy jańǵyrtý máselesi ózekti bolyp otyr. Biz óz tarapymyzdan oblystyń ózekti máseleleriniń sheshilýine tıisti kómekti kórsetemiz», dedi Máýlen Áshimbaev.