Qarýly kúshter qatarynda nebári úsh aı qyzmet etken sarbaz qaza tapty, dep habarlaıdy Egemen.kz.
Qorǵanys mınıstrligi jigit menıngıtten kóz jumdy dese, týystary onyń aýyryp qaıtys bolǵanyna senbeı otyr.
Astana telearnasynyń jazýynsha, 2023 jyldyń kúzinde Ámir Baıturǵanov áskerge shaqyrylǵan. Marqumnyń ákesi onyń óz bolashaǵyn Otanǵa qyzmet etýge jáne qorǵaýǵa arnaǵanyn, áskerge shyn yqylasymen barǵanyn atap ótti. Sonymen qatar balasynyń sportpen shuǵyldanyp, shymyr bolǵanyn aıtady. Alaıda marqumnyń otbasy 21 jeltoqsanda qaraly habardy estıdi.
- Túngi saǵat 03:00-de áskerı bólimnen qońyraý shaldy. Olar ulymnyń esin jııa almaı, es-tússiz jatqanyn habarlap, meniń bólimge dereý kelýimdi surady. Sol kúni tańǵy saǵat 06:20-da ulym esin bilmeı kóz jumdy, – deıdi marqumnyń ákesi Murat Baıturǵanov.
Atys daıyndyǵy sabaqtarynan keıin Ámirdiń jaǵdaıy nasharlaı bastaǵan. Sol kúni ol joǵary dene qyzýymen aýrýhanaǵa túsedi. Bir ýaqytta áskerı bólimdegiler onyń qyzýyn basqandaı bolǵanymen, sarbazdyń aýrýy qaıta asqynǵan.
- Keshke qaraı naýqastyń jaǵdaıy nasharlady. Dene qyzýy ekstremaldy jaǵdaıǵa deıin kóterildi. Osydan keıin naýqas ortalyq aýdandyq aýrýhanaǵa jetkizildi. Sot-medısınalyq saraptamanyń derekteri boıynsha ólimniń aldyn ala sebebi jedel ınfeksııalyq aýrý menıngıt dep anyqtama berildi, – dedi Bas áskerı-medısınalyq basqarma basshysynyń orynbasary Berik Ilııasov.
Alaıda marqumnyń týystary balalarynyń menıngıtten mert bolǵanyna senbeı otyr. Jaqyndarynyń aıtýynsha, ol uzaq ýaqyt boıy búıreginiń aýyryp júrgenine shaǵymdanǵan. Biraq ýaqytyly em-domyn ala almaǵan.
- Buǵan deıin búıregi aýyrǵanyn medısınalyq bólimdegilerge aıtyp, birneshe ret júgingen. 28 qarashada ol ýltradybystyq zertteý júrgizý úshin bólimniń medısınalyq qyzmet basshysyna barady. Tek 6 jeltoqsanda olar qalaǵa baryp, ýltradybystyq zertteý júrgizip, eki jaqty pıelonefrıt dıagnozyn qoıdy. Ony sol kúni-aq birden áskerı gospıtalǵa jatqyzǵanymen, 3 kúnnen keıin shyǵaryp jiberedi, – dedi marqumnyń ákesi.
Ákesi ulymen jıi habarlasyp turǵanyn aıtady. Ulynyń aıtýynsha, kazarmaǵa laýazymdy tulǵalar tekserispen kelgen. Basshylary qalaı tekseris bitedi, dereý emhanaǵa jatqyzylady dep aıtqan. Degenmen jaǵdaı múlde basqasha bolǵan.
Týystary balalarynyń sozylmaly pıelonefrıtten kóz jumdy degen paıymda. Dese de, Qorǵanys mınıstrligi sarbazdyń búırek aýyrýynan qaıtys bolǵanyn joqqa shyǵardy.
- 5 jeltoqsanda jasalǵan sot-medısınalyq derekterge sáıkes jáne aýrýdyń tarıhyn zertteı kele, ólim sebebi arasynda esh baılanys joqtyǵyn kórsetedi, – dedi Berik Ilııasov.
Marqumnyń ákesi Bas prokýratýraǵa tergeý barysyn erekshe baqylaýǵa alýdy surap otyr.