Parlament Senatynyń depýtattary Arman О́teǵulov pen Lázzat Rysbekova Batys Qazaqstan oblysyndaǵy Kaztalov aýdanynda boldy. Jergilikti turǵyndar kezdesý barysynda birqatar ózekti máseleni kóterdi.
Atap aıtqanda, Jalpaqtalǵa aýdan mártebesin qaıtarý, Qaraózen ózeni boıyndaǵy eldi mekenderdi taza aýyz sýmen qamtamasyz etýdegi qıyndyqtar, Jalpaqtal sý qoımasyn salý máseleleri, sondaı-aq kásipkerlik salasyn damytýdy tejeıtin máseleler aıtyldy.
«Batys Qazaqstan oblysynda 10 107 zańdy tulǵa tirkelgen, onyń ishinde 9 775 shaǵyn kásiporyn bar. Memleket basshysy ashyq jáne ózin-ózi qamtamasyz etetin naryqtyq ekonomıkany qalyptastyrý negizgi basymdyq ekenin atap ótken bolatyn. Elimizde naryqty belsendi ıgerip júrgen tabysty orta kásiporyndar kóp emes. Parlament depýtattary stasıonarlyq saýda oryndarynda satylatyn taýarlardyń jalpy assortımentiniń 50 paıyz deńgeıinde otandyq óndirýshilerdiń býyp-túıý óniminiń mindetti úlesin belgileý týraly talap engizý týraly Úkimetke usynys jiberdi», dep atap ótti A.О́teǵulov.
Senatorlar Bókeı ordasy memlekettik tabıǵı qoryǵynyń qyzmetkerlerimen birge qoryqtyń tıisti deńgeıde jabdyqtalmaı otyrǵanyn talqylady. Atap aıtqanda, mekeme qyzmetkerleri senatorlarǵa qoryqtyń qaramaǵynda tehnıkanyń jetispeıtindigi týraly aıtty.
Senatorlar kezdesý sońynda aıtylǵan bastamalar men engizilgen usynystar zań shyǵarý jumysy barysynda eskeriletinin atap ótti.