Sársenbiden beısenbige qaraǵan túni Kerekýde alaı-dúleı boran soǵyp, oblys ortalyǵynda turǵan 52 mln teńgeniń shyrshasyn qulatyp ketti. Dúleı daýyldyń saldarynan oblysta 117 eldi meken jaryqsyz qalyp, avtojoldardyń barlyǵy jabyldy.
Byltyr Pavlodar qalasynyń bıligi «shyrsha jyrymen» este qalǵan edi. 52 mln teńgege satyp alynǵan shyrshanyń beınesi kópshilikke unamaǵan. Endi, mine, jańa shyrsha Arqanyń dúleı daýylyna shydamaı qulady. Onyń ústine jýyqta 53 mln teńgege salynǵan muz qalashyǵynyń biraz bóligi erip ketti. Jańa jyl meıramyn merekeleýge jergilikti qazynadan jalpy somasy 185 mln teńge bólingeni qoǵam tarapynan synǵa ilikkeni de málim.
«Shyrsha qulap túskenimen, negizgi konstrýksııasyna zaqym kelgen joq. Ol tolyǵymen jınalyp, saqtaýǵa jiberildi. Kem-ketigi túzetilip, kelesi jyly qaıta qurylatyn bolady», dep habarlady qalalyq ákimdikten.
«Qazgıdromettiń» habarlaýynsha bul túni Pavlodar oblysy aýmaǵynda jeldiń jyldamdyǵy keı jerlerde sekýndyna 37 metrge deıin jetken. Saldarynan Pavlodar qalasy men 10 óńirde jaryq óship, 5 ǵımarattyń tóbe jabyndylary ushyp ketti. Pavlodar oblysy ákiminiń baspasóz qyzmeti taratqan málimetke súıensek, elektr jaryǵynyń avarııalyq ajyraýy Pavlodar qalasynan bólek, Aqqýly, Aqtoǵaı, Baıanaýyl, Ertis, Pavlodar, Tereńkól, Ýspen, Sharbaqty aýdandarynda, Ekibastuz ben Aqsýdyń aýyldyq aımaqtarynda baıqaldy. Jalpy sany 117 eldi meken jaryqsyz qalǵan.
Keshe saǵat 17.00-de jóndeý brıgadalary 101 eldi mekendi jaryqpen qamtamasyz etip úlgergeni belgili boldy. О́ńirde 65 jóndeý brıgadasy kúsheıtilgen rejimde jumys istep, 8543 tutynýshyny elektr kózine qosqan. Taǵy 930 abonent áli de qamtylmaǵan dep habarlandy.
Aıtyp óteıik, qatty boranda Baıanaýyl aýdanynda malshy adasyp ketti. Ol sársenbi kúni keshkilik qara maldy qaıyryp kelmek bolyp shyǵyp, malmen birge yǵyp ketken. 1975 jylǵy azamat tek keshe tańerteń saǵat 10-dar shamasynda tabyldy. Polısııa organdary azamattyń din aman ekenin málimdedi.
Pavlodar oblysy