Astana qalasynda Koreıa Respýblıkasynda uıymdastyrylatyn IV qysqy jasóspirimder Olımpıadasyna otandyq sportshylardy saltanatty túrde shyǵaryp salý rásimi ótti, dep habarlaıdy Egemen.kz Týrızm jáne sport mınıstrligine silteme jasap.
«Tórt jyldyqtyń basty jarysy 19 qańtar men 1 aqpan aralyǵynda Kanvon provınsııasynyń Kannyn qalasynda ótedi. Saltanatty is-sharaǵa Týrızm jáne sport mınıstri Ermek Marjyqpaev, Ulttyq Olımpıada komıtetiniń ókilderi, sport ardagerleri, federasııa basshylary men memlekettik jattyqtyrýshylar qatysty. Is-shara barysynda Jasóspirimder Olımpıadasynyń ashylý rásiminde tý ustaıtyn sportshylarǵa Qazaqstan Respýblıkasynyń Týy saltanatty túrde tapsyryldy. IV qysqy jasóspirimder Olımpıadasynyń ashylý saltanatynda elimizdiń baıraǵyn short-trekten el chempıony, sport sheberine úmitker Erasyl Shyńǵyshan jáne konkımen júgirý sportynan QR sport sheberi, sondaı-aq el birinshiliginiń jeńimpazy Krıstına Shýmakova alyp shyǵady. О́z kezeginde Erasyl Shyńǵyshan tý ustaýshy retinde kópshiliktiń aldyna shyǵyp, saltanatty túrde ant berdi. Jasóspirimder Olımpıadasynda Qazaqstannyń jasóspirimder quramasy sporttyń 5 túrinen baq synap, 55 medal jıyntyǵyn sarapqa salady. Qysqy Oıyndarda el namysyn 42 sportshy bıatlon, kerlıng, konkımen júgirý, short-trek, shańǵy jarysy, tramplınnen sekirý, taý shańǵysy, shańǵy qossaıysy, frıstaıl mogýl jáne shaıbaly hokkeı sport túrlerinen qorǵaıdy», dep jazylǵan aqparatta.
Týrızm jáne sport mınıstri Ermek Marjyqpaev sóz sóılep, sportshylarǵa sáttilik tiledi.
«Qazaqstan sportshylary Táýelsizdik jyldarynda barlyq Jasóspirimder Olımpıadasynda 29 medal jeńip aldy, onyń 5-i qysqy Oıyndarǵa tıesili. Elimizde qysqy sport túrlerinde jeńispen órilgen jaqsy dástúr bar. Búginde tek elimizge ǵana emes, búkil álemge tanymal dańqty sportshylarymyz halyqaralyq qysqy jarystarda óner kórsetip, únemi júldegerler qatarynan kórinip júrdi. Olardyń qatarynda shańǵyshy Vladımır Smırnov, konkımen júgirýshi Lıýdmıla Prokasheva, bıatlonshy Elena Hrýstaleva, mánerlep syrǵanaýshylar Denıs Ten jáne Elızaveta Tursynbaeva bar. Sizder bul Oıyndarǵa qatysa otyryp, zor tájirıbe jınaısyzdar. Osy qundy tájirıbe bolashaqta paıdaly bolatyny sózsiz, óıtkeni sizder Qazaqstan ulttyq quramasynyń rezervi sanalasyzdar. Búgin biz dástúrli shyǵaryp salý rásimine qatysyp otyrmyz. Sizderge aldaǵy jarysta tek sáttilik tileımin. Osyǵan deıin jıǵan bar sheberlikterińizdi, qabiletterińizdi pash etip, joǵary nátıje kórsetýlerińizge jáne jeke rekordtaryńyzdy jańartýǵa tilektespin! Biz sizderge jankúıer bolyp, jeńis tuǵyrynan kórinýlerińizge shyn nıetpen tileýles bolamyz», dedi E.Marjyqpaev.
14-17 jas aralyǵyndaǵy jasóspirimderdiń qysqy alamanynan álemniń 70 elinen sportshylar qatysyp, 7 sport túriniń 15 baǵdarlamasy boıynsha 81 medal jıyntyǵyna talasady.