Bıylǵy jyldyń qańtar aıynda ótetin UBT bastaldy, ol 10 aqpanǵa deıin jalǵasady. 136 myń adam UBT-ǵa qatysýǵa ótinish berdi. Olardyń 76,3%-y qazaq tilinde, 23,6%-y orys tilinde, 126 adam aǵylshyn tilinde testileýden ótýge ótinish bildirdi, dep habarlaıdy Egemen.kz Ǵylym jáne joǵary bilim mınıstrliginiń baspasóz qyzmetine silteme jasap.
«Talapkerler ótinish berý barysynda olar testileý kúnin, ýaqytyn jáne ornyn ózderi tańdady. Sońǵy birneshe jylda alǵash ret talapkerler eń kóp tańdaıtyn beıindik pánder kombınasııasy ózgerdi. Talapkerlerdiń 18%-y «Bıologııa-Hımııa», 17%-y «Matematıka-Fızıka», 12%-y «Matematıka-Informatıka» pánderin tańdady.
UBT-daǵy pánderdiń sany ózgerissiz qalady, ıaǵnı úsheýi mindetti jáne ekeýi tańdaý boıynsha. Alaıda, «Oqý saýattylyǵy» men «Matematıkalyq saýattylyq» mindetti pánderinen tapsyrmalar sany 5 suraqqa qysqarady. Al beıindik pánderdiń suraqtar sany artyp, 40 test tapsyrmasynan turatyn bolady. Atap ótsek, beıindik pánderde berilgen tizimnen sáıkestikti anyqtaýǵa arnalǵan 5 tapsyrma qosyldy. Osylaısha, UBT tapsyrmalar sany ózgerissiz qalady, jalpy 120 suraq. Onyń ishinde «Qazaqstan tarıhynan» 20 tapsyrma, «Oqý saýattylyǵynan» 10 tapsyrma, «Matematıkalyq saýattylyqtan» 10 tapsyrma jáne eki beıindik pán boıynsha 40 tapsyrma. Joǵary ball – 140, ol da ózgerissiz qaldy. Testileý ýaqyty – 4 saǵat (240 mınýt). Bul rette erekshe bilim berý qajettilikteri bar balalar úshin usynylatyn qosymsha 40 mınýt ýaqyt saqtalatynyn aıta ketý kerek. Test tapsyrýshylar testileý aıaqtalǵannan keıin 30 mınýt ishinde apellıasııaǵa ótinish bere alady. Sertıfıkat appelıasııalyq komıssııanyń sheshiminen keıin talapkerdiń jeke kabınetinde qoljetimdi» ekeni jazylǵan aqparatta.
Qańtardaǵy UBT-ǵa shartty túrde aqyly negizde kúndizgi oqý nysany boıynsha joǵary oqý oryndaryna qabyldanǵan, jazǵy UBT nátıjeleri boıynsha shekti ball jınamaǵandar, shyǵarmashylyq BBT-dan basqa daıyndyq baǵyttaryna, pedagogıkalyq baǵytqa aqyly negizde aýysqysy keletinder, sondaı-aq mektep bitiretin túlekter joǵary oqý oryndaryna aqyly negizde túsý úshin qatysady.