Jas óskinniń aqyl-oıyn damytýda, qoǵam adyndaǵy jaýapkershiligi men senimdiligin qalyptastyryp, tabandylyǵyn arttyrýda toǵyzqumalaq oınaýdyń orny erekshe. Búginde toǵyzqumalaq oınynan túrli jarys uıymdastyrý dástúrge aınalǵan. Qanatyn keńge jaıǵan ulttyq oıynǵa Almaty oblysynyń sportshylary da aıryqsha mán berip, tartysty básekede baq synaýshylardyń qatary jyldan-jylǵa artyp keledi. Osy sebepti, bıyl óńirdiń alys-jaqyn eldi mekenderinen qatysqan áýesqoı oıynshylar arasynda tuńǵysh oblystyq chempıonat ótti.
Eńbekshiqazaq aýdanynyń Esik qalasynda qańtardyń 9-y men 14-i kúnderi aralyǵynda ótken erler men áıelder arasyndaǵy toǵyzqumalaqtyń klassıka, rapıd, blıs túrleri boıynsha baq synasqan saıysqa 90-ǵa jýyq sportshy qatysty. Tartysty básekede óńirdiń Qonaev qalasy men Qarasaı, Ile, Talǵar, Uıǵyr, Jambyl aýdandarynan qatysqan toǵyzqumalaq sheberleri jekeleı synda shyn júırikter qatarynan kórinip, jeńimpazdar tuǵyryna kóterildi.
«Almaty oblysynda toǵyzqumalaq ulttyq sport túri keńinen damyp keledi. Oıynshylar arasynda respýblıkalyq jarystardyń chempıondary az emes, Azııa jáne álem chempıonattaryna qatysyp, júldeger atanǵandar da bar. Osy oraıda oblystyń shalǵaı aýdandarynda ulttyq sporttyń ortalyqtaryn, úıirmeleri men mektepterin ashýdyń mańyzdylyǵy artyp otyr. Sonymen qatar sportshylardy yntalandyrý maqsatynda baǵaly syılyqtar men túrli jeńildikti de qarastyrý qajet. Oblys kóleminde ótetin kelesi chempıonattarda osy atalǵan máselelerdi qolǵa almaqshymyz», deıdi Almaty oblystyq toǵyzqumalaq sporty federasııasynyń prezıdenti Jaras Nııazbek.
Oblystyq chempıonattyń qorytyndysynda jarys jeńimpazdarymen qatar, ótken jyldyń úzdik sportshylary men jattyqtyrýshylaryna da arnaıy dıplomdar men syılyqtar tabys etildi.
Almaty oblysy