Prezıdent Qasym-Jomart Toqaev Qasıetti Taqtyń memlekettermen baılanys jónindegi Hatshysy Pol Rıchard Gallahermen kezdesti, dep jazady Egemen.kz Aqorda baspasóz qyzmetine silteme jasap.
Qasıetti Taqtyń Hatshysymen kezdesý barysynda Qasym-Jomart Toqaev Rım Papasy Fransıskpen óte mazmundy ári nátıjeli júzdesý bolǵanyn atap ótti.
Memleket basshysynyń aıtýynsha, Vatıkannyń dáıekti qoldaýynyń arqasynda Qazaqstan ótkizip jatqan Álemdik jáne dástúrli dinder kóshbasshylarynyń sezderi dinı qaýymdar arasynda ózara túsinistik pen qurmetti nyǵaıtatyn mańyzdy alańǵa aınaldy.
Prezıdent Katolık shirkeýi basshysynyń elimizge jasaǵan tarıhı saparynyń beıbitshilikti nasıhattaý, birlikke shaqyrý turǵysynan sımvoldyq máni bolǵanyn eske salyp, bul sapar tek Qazaqstandaǵy katolık qaýymynyń ǵana emes, óńirdegi basqa da din ókilderiniń arasynda keń qoldaý tapqanyn atap ótti.
Sonymen qatar Memleket basshysy elimizdiń Qasıetti Taqpen bilim berý, densaýlyq saqtaý jáne klımattyń ózgerýine qarsy kúres salalary boıynsha ózara baılanysty nyǵaıtýǵa aıryqsha mán beretinin jetkizdi.
Qasym-Jomart Toqaev qazaqstandyq ǵalymdardyń Vatıkan kitaphanasy men Apostol arhıvindegi tarıhı materıaldardy tegin zertteýine múmkindik bergeni úshin arhıepıskop Pol Gallaherge rızashylyǵyn bildirdi. Sondaı-aq Prezıdent Ana men bala ulttyq ǵylymı ortalyǵy jáne Vatıkan Bambino Gesu pedıatrlyq gospıtali arasyndaǵy yntymaqtastyqty quptady.
Qasym-Jomart Toqaev Qazaqstannyń beıbitshilikti, ózara qurmetti nyǵaıtý úshin etnosaralyq jáne konfessııaaralyq kelisimge beıildi ekenin taǵy da rastady.
Kezdesý sońynda Prezıdent Qasıetti Taqtyń basshylyǵyn Astanadaǵy Álemdik jáne dástúrli dinder kóshbasshylarynyń kezekti sezine qatysýǵa shaqyrdy.