Qazaqstan quramasynyń boksshylary Debresende (Majarstan) Ishtvan Bochkaıdy eske alýǵa arnalǵan halyqaralyq týrnırde bes altyn aldy. Fınalda toǵyz boksshymyz óner kórsetti.
Atap aıtqanda, Ashat Júsipov 48 kıloǵa deıingi salmaqta ýkraınalyq Andreı Tıshkovechti basym daýyspen jeńdi. Sondaı-aq Asyljan Serikbaı (57 kg) majarstandyq Roland Vereshti, Bıbarys Jeksen (60 kg) taǵy bir sharshy alań ıesi Krýzıto Kovachty, Ertýǵan Zeınýllınov (63,5) Rıchard Kovachty basym daýyspen utty. Erasyl Jakpekovtiń (80 kg) qarsylasy majarstandyq Pal Kovach rıngke shyqpaǵandyqtan, jeńis Erasylǵa berildi.
Danııal Sábıt (51 kg) majarstandyq Attıla Bernatqa basym daýyspen ese jiberse, taǵy bir majarstandyq Gabor Vırban (54 kg) Kenje Muratulyn tóreshilerdiń biraýyz sheshimimen qapy qaldyrdy.
Sabyrjan Aqqalyqov (71 kg) ýkraınalyq Iýrıı Zahareevke basym daýyspen jol berdi. Temirlan Muqataev ta (86 kg) ýkraınalyq Danıl Jasannan jeńilip qaldy – 0:5.