Burnaǵy kúni Qazaqstan – Qytaı shekarasynda ornalasqan Dostyq aýlynyń mańynda jańa halyqaralyq saýda-logıstıkalyq ortalyq óz jumysyn bastady.
Atalǵan jobany «Dostyk Storage» JShS Memlekettik kirister komıtetimen birlesip júzege asyrǵan bolatyn. Kózdelgen negizgi maqsat – transshekaralyq logıstıkalyq ınfraqurylymdy damytý jáne «Alakól» jol ótkeliniń ótkizý qabiletin arttyrý. Buǵan deıin Prezıdent Qasym-Jomart Toqaev júk kólikteriniń Qazaqstan – Qytaı shekarasy arqyly ótýin jedeldetý týraly birneshe ret aıtqan bolatyn. Bıznes pen Úkimettiń birlesip qatysýymen júkterdi ótkizý qabilettiligin arttyrý jáne ony resimdeýdi jedeldetý sharalary osylaısha júzege asyryldy.
«Júkterdi óńdeý jáne saqtaý úshin osyndaı ortalyqtar ashý Memleket basshysynyń tapsyrmasy sheńberinde júzege asyrylyp jatyr. Atalǵan ortalyq óz kezeginde shyǵys shekaramyzdaǵy alǵashqy ortalyq ári «Dostyq» – Shyǵys Qazaqstan men Eýropa shekarasyndaǵy eń ozyq bastama», dedi keshenniń ashylý saltanatynda Kólik vıse-mınıstri Maqsat Qalıaqparov.
«Dostyk Storage» qoımasynyń qurylysy qysqa merzimde júzege asyryldy. Jańa qoıma kesheni «Dostyq» kedeniniń «Alakól» keden beketiniń ótkizý qyzmetin táýligine 200-den 600 júk kóligine deıin arttyryp, táýliktik júk aınalymyn 4 myńnan 12 myń tonnaǵa deıin ulǵaıtady dep kútiledi. Bul júk aınalymyn 1 mln tonnadan 3 mln tonnaǵa deıin jetkizedi. «Qazirgi tańda «Alakól» keden beketi arqyly bir baǵytta nebári 180 kólik ótedi. Bıyl bul beketti jańǵyrtý jumystaryn aıaqtap, júk aǵynyn 500 kólikke deıin ulǵaıtýdy kózdep otyrmyz», dedi Qarjy mınıstrligi Memlekettik kirister komıtetiniń tóraǵasy Jandos Dúısembıev.
Aıta keterligi, «Dostyk Storage» JShS logıstıkalyq ortalyǵy 13,5 gektar aýmaqta ornalasqan. Onyń 3,5 gektaryn úı-jaılary men qoıma ınfraqurylymy alyp jatyr. Al 10 gektary júk kólikterin qoıýǵa bólingen. Jobaǵa arnalǵan jeke ınvestısııa 2,8 mlrd teńgeden astam somany qurady. Keshen 3 jyldyq merzimge 100 paıyz (quryltaıshysy Memlekettik kirister komıteti) «Nur Zholy customs services» memlekettik kásipornynyń basqarýyna berildi.