Ulttyq qaýipsizdik komıteti psıhotropty zattardyń masshtabty óndirisin joıdy. Sıntetıkalyq esirtkiniń rekordty partııasy zańsyz aınalymnan alyndy, dep habarlaıdy Egemen.kz UQK baspasóz qyzmetine silteme jasap.
«18 qańtarda Almaty qalasynda jalǵa alynǵan jeke úıde psıhotropty zattardy daıyndaý prosesinde esirtki zerthanasyn uıymdastyrýshy, 1997 jyly týǵan Qazaqstan azamaty qylmys ústinde ustaldy. Tintý kezinde 200 kılogramnan astam «mefedron» esirtkisiniń daıyn ónimi jáne 100 lıtr shıkizaty alyndy. Daıyn esirtki zattarynyń salmaǵyna qarap atalǵan zerthananyń eldegi eń iri zerthana bolǵanyn ańǵarýǵa bolady», delingen habarlamada.
Alynǵan «mefedron» kólemi shamamen 610 myń bir rettik dozaǵa ekvıvalentti. Bul rette, esirtkiler Qazaqstan aýmaǵynda ótkizý úshin arnalǵan. Sot sheshimimen fıgýranttarǵa qamaýda ustaý túrindegi bultartpaý sharasy taǵaıyndaldy.
Qylmystyq kodekstiń 297-baby 3-bóligi boıynsha sotqa deıingi tergep-tekserý júrip jatyr.