Mańǵystaý oblysynda jastar, ásirese mektep oqýshylary arasynda kórkem jáne estetıkalyq gımnastıkaǵa qyzyǵýshylar sany artyp keledi. Qazirgi tańda atalǵan sport túrimen myńnan astam bala shuǵyldanady. Oblystyq kórkem jáne estetıkalyq gımnastıka federasııasynyń jýyrda ǵana taǵaıyndalǵan prezıdenti Aıda Sadatqyzy «Melovoı» sport keshenine baryp, jattyqtyrýshylardyń jumysymen tanysyp, jattyqtyrýshylar men sportshylarǵa jyly lebizin bildirdi.
«Gımnastıka tabandylyqty talap etedi. Sporttyq jolyńda kezikken kedergiler men qıyndyqtarǵa moıymaý kerek. Respýblıkalyq, halyqaralyq baıqaýlarda óner kórsetý úshin úzdiksiz daıarlyq, júıeli jattyǵý qajet. Aldaǵy Shymkent qalasynda ótetin Qazaqstan chempıonatynda jeńis tileımin», dedi Aıda Sadatqyzy.
Bıbigúl Ernazarova oblystyq federasııada 2016 jyldan beri qyzmet etedi. 9 jasynan beri gımnastıkamen aınalysatyn tájirıbeli sportshynyń jattyqtyrýshy retinde eńbek ótili 30 jylǵa jýyqtaıdy.
«5 jastan bastap qyzdar kishi, orta jáne úlken toptarda jattyǵady. Jas ereksheligine qaraı jattyǵý ýaqyty 1–4 saǵatqa deıin sozylady. Jarys aldynda daıyndyqty kúsheıtemiz», deıdi ol.
2024 jyly naýryzda Mańǵystaý oblysynda kórkem jáne estetıkalyq gımnastıkadan respýblıkalyq jarys ótedi. Atalǵan jarysta oblys birinshiliginde iriktelgen ár razrıadtan 3 top, 5 sportshy oblys namysyn qorǵaıdy.
О́zderi úshin barlyq jaǵdaı jasalǵan sport kesheninde balǵyn gımnastar qaýyrt daıyndyqqa kirisken.
Mańǵystaý oblysy