Memleket basshysy Qasym-Jomart Toqaev Almaty qalasyna jumys sapary barysynda seısmıkalyq qaýipsizdik máseleleri jóninde keńes ótkizdi. Jıyn barysynda Prezıdent qalanyń azamattyq qorǵanys júıesi jer silkinisine daıyn bolmaı shyqqanyn, al quzyrly organdar tabıǵattyń bul synaǵynan óte almaǵanyn atap ótti, dep habarlaıdy Egemen.kz Aqorda baspasóz qyzmetine silteme jasap.
«2021 jyly jeti mınıstrliktiń birlesken buıryǵymen Qazaqstan Respýblıkasynyń 2021-2023 jyldarǵa arnalǵan seısmıkalyq qaýipsizdigin qamtamasyz etý jumystarynyń tıimdiligin arttyrý jónindegi sharalar kesheni bekitildi. Basqa da mindetterdi qosa alǵanda, bul qujatta Almaty qalasy úshin joıqyn jer silkinisteri týraly avtomattandyrylǵan erte habarlaý júıesin engizý kózdelgen edi. Ádettegideı, berilgen esepte bári durys. Osy maqsattarǵa bólingen qomaqty qarajat ıgerilgen, nysandardy qabyldap alý aktisine qol qoıylǵan. Bas prokýratýraǵa Sybaılas jemqorlyqqa qarsy is-qımyl agenttigimen birlesip, osy máselemen aınalysýdy jáne bir aıdyń ishinde qarajattyń qaıda jumsalǵanyn, dabyl júıesiniń nege jumys istemegenin anyqtaýdy tapsyramyn. Soǵan qaraǵanda, búkil elimizde ótkizilgen 27 myń seısmıkalyq jattyǵý men 2,5 myń semınardyń da túk paıdasy bolmady», dedi Memleket basshysy.
Qasym-Jomart Toqaev Seısmologııa salasyn damytýdyń 2024-2028 jyldarǵa arnalǵan keshendi josparyn ázirlep jatqan Úkimetke seısmıkalyq qaýipsizdikti qamtamasyz etý tásilderin qaıta qaraýdy tapsyrdy. Sonymen qatar Prezıdent bul jumystyń nátıjelerin baǵalaýdyń naqty ólshemderin ázirleýdi jáne tıisti sharalar qabyldaýdy talap etti.
«Seısmologııalyq monıtorıng pen jer silkinisin boljaý júıesin túbegeıli jetildirý qajet. Azamattar alǵashqy dúmpýge deıin birneshe sekýnd buryn Google servısi eskertý jasaǵanyn aıtyp jatyr. Bizdiń júıeler bulaı isteı almady. Biz elimizde «smart-qalalar» qurýǵa nıettimiz. Olardy basqarý jańa tehnologııalarǵa, sonyń ishinde jasandy ıntellekt salasyndaǵy sońǵy jetistikterge negizdelýi kerek. Sondyqtan álem boıynsha tıimdiligi dáleldengen ınnovasııalyq sheshimderdi qoldanysqa belsendi túrde engizý qajet. Úkimet qysqa merzim ishinde zamanaýı tehnologııalardy qoldanýǵa qatysty ońtaıly sheshim shyǵarýy kerek. Árıne, seısmıkalyq qaýipti aımaqta ornalasqan elimizdegi eń iri qala retinde Almatyǵa basymdyq bergen jón. Bilikti seısmologtar men basqa da mamandardy daıarlaýǵa erekshe nazar aýdarý qajet», dedi Prezıdent.