«Amanat» partııasy fraksııasynyń múshesi Marhabat Jaıymbetov veterınarııa salasy máseleleri jáne kadrlarmen qamtamasyz etý týraly Premer-mınıstrdiń orynbasary Serik Jumanǵarınge depýtattyq saýal joldady, dep habarlaıdy Egemen.kz.
Statıstıka kórsetkendeı, jyl saıyn adamdar men janýarlardyń «Sibir kúıdirgisin» juqtyrýy tirkeledi. Byltyr oǵan shaldyǵýdyń rastalǵany 37, onyń ishinde Jambyl oblysynda 19, Aqmola oblysynda 15, Qaraǵandy oblysynda 3 jaǵdaı anyqtalǵan.
«О́kinishke qaraı, Qaraǵandy oblysyndaǵy sońǵy jaǵdaı qazamen aıaqtaldy. Barlyq juqtyrǵan janýarlarmen baılanysta bolǵan janýarlar da birge órteldi. Sol ólgen maldardyń kóni tazalandy ma, al topyraǵy she? Bul – jabýly qazan qalpynda qalyp otyr. Sondaı-aq vaksına satyp alýǵa memleketten jyl saıyn bólinetin qomaqty qarajat dalaǵa ketkeni me? Osy oraıda veterınarııa salasyndaǵy ýákiletti organ jyl saıyn jeke úı sharýashylyǵynda ınfeksııalar paıda bolǵan kezde nemen aınalysady degen suraq týyndaıdy. Bir sózben aıtqanda biz ýaqtyly vaksına salýǵa jáne janýarlar men adamdarǵa juqtyrýdyń aldyn alýǵa daıyn emespiz», dedi depýtat.
Depýtattyń sózinshe, Qaraǵandy oblysynda bolǵan jaǵdaı aldaǵy ýaqytta qaıtalanýy ábden múmkin. Aýyryp em izdegenshe, aýyrmaıtyn jol izdeýdiń amalyn oılaıtyn ýaqyt. Al qolynda azǵantaı maly bar jurttyń sengen veterınarlarynan aıtarlyqtaı qaıyr bolmaı tur. Sebebi jumys istemeıtin zerthana jáne shaılyǵyna jetpeıtin aılyq olardy qajytqan. Jastar jaǵy atalǵan salaǵa jolaǵysy kelmeıdi.
«Qazir mal bazarlarynda, dúkenderde, tipti, áleýmettik jeliler arqyly da et satylyp jatyr. Biraq satylymda turǵan qandaı et ekendigin malǵa aýrý juqpaǵandyǵyn eskerip jatqandary shamaly. Satylymdaǵy et zerthanada tekserilgen be, veterınar mamandardyń ruqsaty bar ma?», dedi ol.
M.Jaıymbetovtiń aıtýynsha, qala bazarlaryndaǵy veterınarııalyq-sanıtarııalyq saraptaý zerthanalarynyń kóbi jekemenshik ıelerinde. Sol sebepten etke beriletin anyqtamalardy ońdy-soldy berýdi toqtatý qajet. Sonymen qatar vanksınalardy saqtaý jáne tasymaldaý boıynsha sharttar tolyq oryndalmaı jatady.
«Jergilikti atqarýshy organdar veterınarııa salasyndaǵy normatıvtik qujattarǵa analıtıkalyq saraptama jasap, memlekettik sanıtarııalyq baqylaý-qadaǵalaý jumysyn kúsheıtýi kerek. Vaksınalardy saqtaý prosesin kúsheıtý qajet. Zerthanalardyń jaýaptylyǵyn arttyrý qajet, tipti qylmystyq jazaǵa deıin qarastyrý kerek. Maldyń tólin eskere otyryp, janýarlardyń asa qaýipti aýrýlaryna qarsy veterınarııalyq preparattardy ýaqtyly satyp alýdy júzege asyrý qajet, aýrý maldy órteıtin qondyrǵylardy qalypqa keltirý kerek, onyń ishinde maldyń kónin jáne topyraǵyn tazartý boıynsha jumystardy ońtaılandyrǵan abzal. Sheteldik tájirıbelerdi qaraı otyryp, janýarlardyń asa qaýipti aýrýlarynyń veterınarııalyq is-sharalaryn josparlaý qajet. Áleýmettik tólemderdi kózdep jáne jalaqyny kóterý arqyly kadrlar máselesin keshendi sheshý qajet», dep túıindedi depýtattyq saýalyn Marhabat Jaıymbetov.