Qazaqstan Prezıdenti Qasym-Jomart Toqaevtyń ókimimen 2023 jyly 75 ádebıet jáne óner qaıratkerine memlekettik stıpendııa taǵaıyndaldy. Búgin Almaty qalasynda ótken saltanatty marapattaý rásiminde Mádenıet jáne aqparat mınıstri Aıda Balaeva jas jazýshylar men aqyndarǵa Prezıdenttik arnaýly ádebı syılyqty tabys etti, dep jazady Egemen.kz.
«Prezıdentimiz taıaýda «Egemen Qazaqstan» gazetine bergen suhbatynda: «Biz ozyq oıly ult retinde halyqty ydyratatyn emes, biriktiretin joldy tańdaýymyz kerek» dedi. Ádiletti ári Qýatty Qazaqstan qurý jolynda irgeli reformalar men jańa bastamalarǵa jol ashty. Prezıdenttiń bastamalaryn iske asyrýda shyǵarmashyl zııaly qaýym ókilderi men mádenıet qaıratkerleri mańyzdy ról atqarady. Sizder táýelsizdigimizdiń tuǵyrly bolýy men ulttyq birlik pen tutastyqtyń berik ornaýyna súbeli úles qosyp kelesizder. Jyl saıyn taǵaıyndalatyn memlekettik stıpendııa – memlekettiń mádenıet pen óner qaıratkerlerine, shyǵarmashylyq qyzmetkerlerine jáne jas daryndarǵa jasaǵan qoldaýy men qamqorlyǵynyń aıǵaǵy, sondaı-aq, olardyń Qazaqstannyń mádenıetin órkendetip, álemge tanytýǵa qosqan úlesterine kórsetilgen qurmet», dep atap ótti mınıstr.
Qazaqstan Jazýshylar Odaǵy myńǵa jýyq kásibı jazýshylardyń basyn biriktirgen. Qalamger qaýymǵa, mádenıet salasy maıtalmandaryna qoldaý kórsetý – mınıstrlik jumysynyń negizgi maqsattarynyń biri.
О́tken jyly Prezıdent Jarlyǵymen el damýyna eleýli úles qosqan 6 qalamger «Qazaqstannyń halyq jazýshysy» ataǵymen, 8 óner qaıratkeri «Qazaqstannyń halyq ártisi» qurmetti ataǵymen marapattaldy. Jyl saıyn «Umai» jáne «Aıboz» ádebı-mádenı ulttyq syılyqtary, «Daryn» memlekettik jastar syılyǵy beriledi.
Mádenıetaralyq jáne etnosaralyq birlikti nyǵaıtý boıynsha byltyr alǵash ret uıymdastyrylǵan ádebıet jáne jýrnalıstıka salasyndaǵy 11 úzdik jumysqa arnaıy syılyq berildi.
Bıyl Joshy Ulysynyń qurylǵanyna 800 jyl, tarıhshy Muhammed Haıdar Dýlatıdiń 525 jyldyǵy, ǵalym Qanysh Sátbaevtyń 125 jyldyǵy, jazýshy Ábdijámil Nurpeıisov, Halyq qaharmany Raqymjan Qoshqarbaev pen Saǵadat Nurmaǵanbetovtiń 100 jyldyqtaryn jáne basqa da tulǵalarymyzdyń mereıtoılaryn atap ótemiz.
Mınıstr aqyn-jazýshylar men ádebıettanýshylarǵa, dramatýrgter men pýblısısterge, teatr, kıno jáne balet akterlerine, qolónershiler men ózge de mádenıet maıtalmandaryna stıpendııa tabys etti.
Mádenıet salasyndaǵy stıpendııa Asanáli Áshimov, Myrzataı Joldasbekov, Bıbigúl Tólegenova, Oljas Súleımenov, Iranbek Orazbaev, Nurǵalı Núsipjan, Tuńǵyshbaı Jamanqulov, Merýert О́tekeshova, Amandos Aqanaev, Dýlat Isabekov, Tólen Ábdik, Ákim Tarazı, Gýlver Razıeva jáne basqa da qazaq ádebıeti men óneriniń maıtalmandaryna tabystaldy.
Sonymen qatar Kann halyqaralyq festıvaliniń laýreaty Samal Eslámova, skrıpkashy Erkebulan Saparbaev, sýretshi Renat Elýbaev, ánshiler Andreı Tregýbenko, Nazym Saǵyntaı, akter Maksım Iаshenko sekildi jáne ózge de jas daryndarǵa memlekettik qoldaý kórsetildi.