Qostanaıdaǵy Dámer aǵamnyń úıinde otyryp, ol kisiniń:
– Jeńgeńdi jekeshelendirip aldym, – degenin estip, iship otyrǵan tamaǵyma qaqalyp qalǵanym bar.
– Bir sen emes, alǵash estigen jan ataýly osy keıipti kıgen, – dep kókem mán-jaıdy túsindirgen boldy. – Qolymnan kelgeni sol... bajaılap qarasam myna zaman tek jekemenshikten turady eken. О́z basyma jekeshelendiretin birde-bir zat buıyrmapty. Eń aıaǵy úı, qora-qopsy, az-maz mal ataýlyny «tórińizden kórińiz jaqyn» degen mánde sóz aıtqan soń, qoldaǵy kelin-balaǵa basybaıly ótkizip bergenbiz. Sodan «búırekten sıraq shyǵaryp», basqa bireýdiń menshigine ótip kete me degen qaýippen myna qara kempirdi jekeshelendirip aldym, – dep qarqyldap kep kúlip, onyń mór basylǵan, kýálandyrǵan qatyrma qaǵazdaryn aldyma jaıyp saldy.
Kózim jumylyp, aýzym ańqıǵan maǵan: «Baıaǵyda-aq sóıtýim kerek eken» dep alyp, jekeshelengen jeńgemniń jaı-japsaryn aıtqanda kádimgideı kózim ashylyp, birden men de nege ǵana sóıtpeske degen oı keldi.
Sóıttim de men kókemniń jón-jobasyn táptishtep surap bilip, birden menshiktep beretin mekemege tarttym.
Ondaǵylar: «Estimegen elde kóp... degen, qatynyn jekeshelendirýge kelgen sizdi kórdik» dep tań-tamasha bolyp, raıymnan qaıtpas meni bilgendikten: «Jeńgemizdi jekeshelendirý úshin ol kisini dúnıege ákelgen áke-sheshesiniń jazbasha kýálandyrǵan ruqsaty kerek» degeni.
Salyp uryp atam men eneme kelip, mán-jaıdy aıtyp edim, ekeýi de «Astapyralla!» dep jaǵalaryn ustap, maǵan asa mán bere bajaılap qarap, «aýrý-syrqaýdan» din aman-esen ekenimdi bilip, enem kórshi bólmeniń esigin jaýyp alyp, qyzymen telefonda sál-pál kúbirlesken bolyp kelip:
– Al balam, jekeshelendirý úshin sen bizge... – dep alyp, kókı-sókıdi kóktetsin kelip. Kókı-sókıdiń úlkeni – myna otyrǵan úılerine kúrdeli jóndeý ótkizýim kerek eken... Kenje balasynyń úılený toıyn túp-túgel moınyma alýym kerek eken...
...Ashýǵa býlyǵyp úıge kelsem qatyn:
– Ne, jolyń bolmady ma? – dep yrjııady.
– Atańa nálet sen de tabalap otyrmysyń! – dep alara qarap edim:
– Oý, kókime, kózińdi ash. Ne, jekeshelendirý ońaı dep pe ediń? Múlik, zat emes, baqandaı adamdy jekeshelendirmek.Taǵy da ashýlanady, baqyryp-shaqyrady. Táýbeńe kel! Meniń qunymdy bilesiń be óziń? Otasqan otyz jyldaǵy otyńmen kirip, kúlińmen shyqqan mańdaı terimdi baǵala. Bir emes, baqandaı bes balany toǵyz aı kóterip, tolǵatyp, jetkizip, eseıtkendegi eńbegimdi eskerdiń be?.. – dep tereńnen tartyp tebirengen kempirdi ázer dep toqtattym-aı.
– Qoıdym kempir! Búıtken jekeshelendirý bar bolsyn, – dep sabyrǵa shaqyryp edim:
– Qoımaımyn! Osyny bilip, Dámer qaıyn aǵadan estip, mende áreket jasap... seni men jekeshelendirip alǵanmyn... áke-shesheńdi erterek jutyp qoıǵan ózińnen kór. Ondaǵylar seniń áke-shesheńniń qaıtys bolǵandyǵy jónindegi anyqtamany talap etip, apara qalyp edim, seni maǵan basy bútin jekeshelendirip berdi... – deıdi.
«Sasqan úırek artymen súngıdi» deýshi edi:
– Áp, bárekeldi, oń bolǵan. Bizdi bireýler jekeshelendirip almaı turǵanda munymyz jón bolǵan, – deppin.
Berik SADYR