О́tken jyly ákimdik qyzmetkerlerimen birge alaıaqtyq boıynsha kúdikke ilingen Atyraý qalasynyń ákimi Qaırat Orazbaev tergeý ızolıatorynan úıqamaqqa aýystyryldy, dep jazady Egemen.kz.
Qalalyq sot burynǵy ákimniń densaýlyq jaǵdaıyna baılanysty sottyń bultartpaý sharasy ózgergenin habarlady.
«Atyraý qalasynyń mamandandyrylǵan tergeý sotynyń 2023 jylǵy 11 qarashadaǵy qaýlysymen Q.Orazbaevqa qatysty eki aı merzimge qamaýǵa alý túrindegi bultartpaý sharasy densaýlyǵyna baılanysty úıqamaqqa ózgertildi», delingen Atyraý qalalyq mamandandyrylǵan tergeý sotynyń aqparatynda.
Aıta keteıik, 2020-2022 jyldary Atyraý qalasy ákimdiginiń burynǵy laýazymdy tulǵalary jeke turǵyn úı qurylystary úshin rekreasııalyq aımaqtarǵa, onyń ishinde jasyl jelek aımaqtary, saıabaqtar, skverler, jaǵalaýlar jáne taǵy basqa sanatqa jatatyn jer ýchaskelerin zańsyz bergeni anyqtalǵan. Osyǵan baılanysty QR Qylmystyq Kodeksiniń 190-baby 4-bóliginiń 2-tarmaǵynda kózdelgen qylmystyq quqyq buzýshylyq jasady degen kúdikpen Atyraý qalasynyń eks-ákimi Qaırat Orazbaev ustalǵan edi.