Tennısten Melbýrnde ótip jatqan Aýstralııanyń ashyq birinshiliginiń áıelder arasyndaǵy saıysy belarýs Arına Sobolenkonyń jeńisimen aıaqtaldy.
Alǵashqy aınalymdarda germanııalyq Ella Zaıder, chehııalyq Brenda Frýhvırtova, ýkraınalyq Lesıa Sýrenko jáne amerıkalyq Amanda Anısımovadan aılasyn asyrǵan ol shırek fınalda Chehııanyń taǵy bir ókili Barbara Kreıchıkovany qapy qaldyrdy. Jartylaı fınalda AQSh-tyń myqtysy Korı Gaýffty jeńgen Sobolenko aqtyq aıqasta qytaılyq Chjen Sınvenmen sheberlik baıqasty. 1 saǵat 16 mınýtqa sozylǵan báseke 6:3, 6:2 esebimen aıaqtaldy. Osylaısha, Belarýstiń betkeustary Aýstralııanyń ashyq birinshiligin qatarynan eki ret utty. Byltyr ol fınalda bizdiń Elena Rybakınany eńsergen edi.
Bir ǵajaby, bıylǵy týrnır barysynda Arına Sobolenko qarsylastaryna birde-bir sette ese jibergen joq.