Almatyda Túrkııanyń tuńǵysh Prezıdenti Mustafa Kemal Atatúrikke arnalǵan eskertkishtiń saltanatty ashylýy ótti. Tas tuǵyrǵa qonǵan eńseli eskertkishti Almaty qalasynyń ákimdigi Mustafa Kemaldyń qurmetine ótken jyly ashylǵan «Atatúrik skverine» ornatty.
Eskertkishtiń ashylý saltanatyna Mádenıet jáne aqparat mınıstri Aıda Balaeva, Túrkııa Respýblıkasynyń Qazaqstandaǵy elshisi Mustafa Kapýdjý, TÚRKSOI Halyqaralyq uıymynyń Bas hatshysy Sultan Raev, Almaty qalasynyń ákimi Erbolat Dosaev, túrik dıasporasy men zııaly qaýym ókilderi qatysty.
Saltanatty jıyndy ashqan mınıstr Memleket basshysy Qasym-Jomart Toqaev eskertkish ornatý týraly tapsyrmany Túrkııa Respýblıkasynyń 100 jyldyǵyna oraı Rejep Taıyp Erdoǵannyń elimizge sapary kezinde bergenin atap ótti.
«Túbi bir, tarıhy tamyrlas Túrik eli – biz úshin keshe de, búgin de tilegi ortaq, maqsaty bir baýyrlas memleket. Memleket basshylarynyń arqasynda osy kúnderi bizdiń elder arasyndaǵy qarym-qatynas jańa deńgeıge kóterilip, qazirgi tańda barlyq salalar qarqyndy damyp keledi. Ásirese baýyrlas eki el arasyndaǵy yntymaqtastyqtyń altyn kópiri bolǵan mádenı baılanysymyz zor. Bul rette Túrkııa tarıhynda óshpes iz qaldyrǵan qazirgi túrik memleketiniń negizin qalaýshyǵa erekshe mán beriledi. Ol júzege asyrǵan mádenı, saıası, ekonomıkalyq, áleýmettik reformalarymen zamanaýı qoǵamnyń qurylýyna baǵa jetpes úles qosty. Memlekettiń damýyna negiz bolatyn reformalar kúni búginge deıin jalǵasyp keledi», degen Aıda Balaeva eskertkish Túrkııanyń tarıhı murasyn qurmetteýdi ǵana emes, eki eldiń dostyǵy men yntymaqtastyǵyn da beıneleıtinin atap ótti.
Bıiktigi 3 metrden turatyn qola eskertkishtiń tuǵyry granıtten jasalǵan. Eskertkishtiń avtorlary músinshiler – Aıdos Búrkitbaev pen Tımýr Ermuhametov.
ALMATY