Astanada Ulttyq quryltaı jumys seksııalarynyń otyrystary ótti. Is-shara barysynda Ulttyq quryltaı tóraǵasynyń orynbasary – Memlekettik keńesshi Erlan Qarın quryltaı jumysynyń negizgi baǵyttary jóninde Prezıdenttiń 3 qańtarda «Egemen Qazaqstan» gazetindegi suhbatynda aıtylǵanyn atap ótti. Sondaı-aq osy konsýltatıvtik-keńesshi organnyń qyzmeti aıasynda Memleket basshysy kótergen bastamalardyń júzege asyrylý barysyna qysqasha toqtaldy.
Atap aıtqanda, Memlekettik keńesshi Prezıdenttiń Shyǵys Qazaqstan oblysy men Abaı oblysynda jańa aýdandardy qalpyna keltirýge jáne qurýǵa, óńirlik rámizderdi retteýge, sondaı-aq «Áziret Sultan» tarıhı-mádenı qoryq-mýzeıine «Ulttyq» mártebe berýge, «Balalar kitaphanasy» jobasyna qatysty bastamalary júzege asyrylǵanyn erekshe atap ótti.
Erlan Qarın zań men tártip qaǵıdattaryn bekitý jáne ilgeriletý jumystarynyń qoǵamdyq mańyzy zor ekenine nazar aýdardy. Atap aıtqanda, turmystyq zorlyq-zombylyqqa qarsy kúres, balalar men áıelderdiń quqyqtaryn qorǵaý, Nashaqorlyqqa jáne esirtki bıznesine qarsy kúrestiń 2023-2025 jyldarǵa arnalǵan keshendi josparyn bekitý týraly zań jobasyn ázirleý, Parlament Májilisiniń veıpterdi elimizge ákelýge, óndirýge, satýǵa jáne taratýǵa tyıym salý týraly zań jobasyn qabyldaýy osy baǵyttaǵy aýqymdy jumystardyń aıasyna kiredi.
Is-shara aıasynda bir mezgilde «Azamattyq qoǵam», «Mádenıet. О́ner. Rýhanııat», «Bilim jáne ǵylym», sondaı-aq «Áleýmettik-ekonomıkalyq damý» seksııalarynyń jumys otyrystary ótti.
Seksııalardyń jumysy barysynda memlekettik organdar Ulttyq quryltaı músheleriniń buǵan deıin aıtqan usynystaryna oraı pikir bildirdi. Sondaı-aq qoǵamnyń birligin nyǵaıtýǵa, qoǵamdyq tártip pen zańdylyqtyń saqtalýyna, ulttyq qundylyqtardy nasıhattaýǵa baǵyttalǵan jańa usynystar talqylandy.
Ulttyq quryltaı hatshylyǵy jıyn barysynda kóterilgen bastamalardy jınaqtap, muqııat zerdeleıdi.
Qazir kóktemde Atyraýda ótetin Ulttyq quryltaıdyń úshinshi otyrysyna daıyndyq jumystary júrgizilip jatyr.