Semeı qalasyndaǵy Shákárim atyndaǵy kópbeıindi №5 gımnazııanyń 9-synyp oqýshylary Aıjan Jumabekova men Shuǵyla Ýalhan turmystyq qaldyqtardan seısmograf quralyn oılap tapty. Quraldy seısmıkalyq qaýipti aımaqtarda, jańadan bastalǵan qurylys nysandarynda qoldanýǵa bolady.
Ǵajaby sol, jas ónertapqyshtar bıik ǵımarattardyń seısmıkalyq jaǵdaıyna alańdaýshylyq tanytyp, mehanıkalyq úlgide qural jasap shyǵarǵan. Qaǵaz taspa, úıkelisti týdyratyn laıner, baraban, qozǵaltqyshqa arnalǵan qýat kózinen turatyn quralǵa Eınshteın datchıkterin, sondaı-aq Ardýıno baǵdarlamasyn qosqan. Olar ózderi oılap tapqan quraldy mektepte edenge, qabyrǵaǵa ornatyp, áserin baıqaý úshin paıdalanyp kórgen. Eden terbelisine tájirıbe jasaǵanda sekirgen kezdegi qozǵalysty baıqaǵan.
– Fızıka sabaǵynda alǵan bilimimizdi qoldana otyryp, ǵımarattarmen qatar tehnıkanyń edenge jáne qabyrǵaǵa tıgizetin seısmıkalyq áserin qarastyrý úshin seısmograftyń nátıjesin salystyrdyq. Naqty nátıje alý maqsatynda derekter tirkeýishi einstein™ Tablet +2 planshettiń Milab baǵdarlamasyndaǵy Heart Rate datchıgin qoldanyp otyrmyz. Jobamyzdyń jetekshisi – fızıka páninen dáris beretin Alýa Bıimbetova, – deıdi ǵylymı jańalyqqa jany qushtar oqýshylar.
Seısmografty seısmıkalyq qaýipti aımaqtarda, mysaly, taýly jerlerde, aýyldyq okrýgterde, jańa qurylystarda, bilim alý barysynda fızıka-geografııa baǵytyndaǵy oqý mekemelerinde qoldanýǵa bolady. Jas ónertapqyshtardyń aıtýynsha, seısmograf modeliniń qurylysy men jumys isteý múmkindigin basqa analogtermen salystyryp kórgende, onyń quny qoljetimdi, salmaǵy jeńil ári tasymaldaýǵa yńǵaıly ekenine kóz jetip otyr. Bolashaqta oqýshylar ǵımarattardyń qaýipsizdigin aldyn ala zerttep, qashyqtan basqarylatyn seısmograf quralyn oılap shyǵarýdy josparlap otyr.
SEMEI