Senattyń Áleýmettik-mádenı damý jáne ǵylym komıtetiniń depýtattary keńeıtilgen otyrysta «Qazaqstan Respýblıkasynyń keıbir zańnamalyq aktilerine bilim berý, tálimgerlik jáne balalardyń qaýipsizdigi máseleleri boıynsha ózgerister men tolyqtyrýlar engizý týraly» zańdy talqylady, dep habarlaıdy Egemen.kz.
Atalmysh qujat bilim berý jáne jetim balalardyń quqyqtaryn qorǵaý salasyndaǵy zańnamany jetildirýge baǵyttalǵan.
Zań mektepterde uıaly telefondardy paıdalaný qaǵıdalaryn bekitýdi, balabaqshaǵa oryn berýdiń biryńǵaı kezegin qamtamasyz etýdi, tálimgerlik ınstıtýtyn retteý jónindegi normalardy, sondaı-aq bilim berý uıymdarynda zorlyq-zombylyqty nasıhattaıtyn jáne sýısıdke ıtermeleıtin aqparattyń taralýyna jol bermeý jóninde sharalar qabyldaýdy kózdeıdi.
Sonymen qatar balalar qaýipsizdigin qamtamasyz etý maqsatynda balalardyń terezeni ashýyna kedergi keltiretin arnaıy tetikterdi mindetti túrde ornatý jóninde zańnamalyq talaptar belgilenedi, sondaı-aq mektep, balabaqsha men aýrýhanalar qurylysyn eskermeı kópqabatty turǵyn úı salýǵa tyıym salynady.
Senatorlardyń aıtýynsha, zańnyń qabyldanýy bilim berýdi retteýdiń ulttyq júıesiniń tıimdiligin odan ári kúsheıtýge jáne bilim berý uıymdaryndaǵy jetim balalar men ata-anasynyń qamqorlyǵynsyz qalǵan balalarǵa jeke qoldaý kórsetýge yqpal etedi.
Komıtet músheleri talqylaý qorytyndysy boıynsha zańdy Palata otyrysynda qaraýǵa jiberý týraly sheshim qabyldady.