Otandyq BAQ ókilderi Indýstrııa jáne qurylys vıse-mınıstri Tımýr Qaraǵoıshınnen Almatydaǵy sapasyz salynǵan úıler kelesi jer silkinisine tótep bere almasa, ǵımarattardyń opyrylýyna kim jaýap beretinin surady, dep habarlaıdy Egemen.kz.
Vıse-mınıstr jedel áreket etý jáne úılerdi tekserý sharalary odan ári kúsheıtiledi dep sendirdi.
«Tórt-bes balldyq jer silkinisi boldy, úıler qalypty jaǵdaıda. Nysannyń sapasy úshin sol úıdiń jobalaýshysy jaýap beredi. Birinshiden, nysan sapasy jobaǵa baılanysty. Ekinshiden, mundaı qurylysqa belgili bir obektilerge saraptama júrgizgen sarapshylar jaýapty. Úshinshiden, júktelgen jaýapkershilikti qurylysshylar da sezinýi kerek. Sondyqtan qurylysshylarymyz ǵımarat salǵan kezde jobany berik ustanyp, durys ári sapaly qurylyspen aınalysýy kerek», dedi Tımýr Qaraǵoıshın.