Fransııanyń Monpele qalasynda ótip jatqan ATR týrnırinde soqyr jerebe Qazaqstannyń qos tennısshisi Aleksandr Býblık pen Aleksandr Shevchenkony shırek fınalda jolyqtyrdy.
Álemdik reıtıngte 27-orynda turǵan Býblık birinshi kezeńde bos bolyp, ekinshisinde kanadalyq Denısa Shapovalovty (№137) shań qaptyrǵan edi. Úzdikter tiziminde 59-satyǵa jaıǵasqan Shevchenko chehııalyq Dalıbor Svrchına (№194) men fransııalyq Gregýar Barrerden (№104) basym tústi. Qazaqstannyń qos tennısshisi arasyndaǵy báseke 2 saǵat 8 mınýtqa sozylyp, 4:6, 6:3, 6:4 esebimen elimizdiń birinshi raketkasynyń paıdasyna sheshildi. Jartylaı fınalda Býblık ATR reıtınginde 30-orynǵa turaqtaǵan Kanadanyń oıynshysy Felıks Oje-Alıassımmen kúsh synasty. Alǵashqy sette 4:6 esebimen ese jibergen otandasymyz aqyrynda jeńisti qarsylasynyń ýysynan julyp áketti – 6:4, 6:4. Fınalda ol horvatııalyq Borna Chorıchpen kezdesedi.
Al Taılandtyń Hýahıninde qytaılyq Van Sınıýınen jeńilgen Iýlııa Pýtınseva (№70) kelesi kúni-aq Ábý-Dabıge attandy. Biraq ol jaqta da onyń joly bolmady. BAÁ-niń astanasynda jerlesimiz ıspanııalyq Rebeka Masharovadan (№86) utyldy – 7:6, 4:6, 2:6.