Fransııanyń Monpele qalasynda tennısten júlde qory 579 320 eýrony quraǵan «ATR 250» týrnıri aıaqtaldy. Fınaldyq saıysta Qazaqstannyń birinshi raketkasy Aleksandr Býblık horvatııalyq Borna Chorıchpen kúsh synasty.
Býblık fınalǵa deıin kanadalyq Denıs Shapovalov (№137), jýyrda ǵana Qazaqstan azamattyǵyn alǵan Aleksandr Shevchenko (№59) jáne Úıeńki japyraqtary eliniń taǵy bir ókili Felıks Oje-Alıassımnen (№30) aılasyn asyrdy. Al sheshýshi kezdesýdiń alǵashqy seti Borna Chorıchtiń jeńisimen aıaqtalsa, qalǵan ekeýinde Aleksandr Býblık basymdyq tanytyp, bas júldeni oljalady. Esep – 5:7, 6:2, 6:3. Osy tabysy arqyly ol 88 125 eýrony enshiledi.
Bul kúnderi Dýbaıda turyp jatqan 27 jastaǵy Zagreb qalasynyń týmasy B.Chorıch óziniń sporttyq mansabynda ATR týrnırlerin úsh ret utty. 2019 jyly Aýstralııanyń ashyq birinshiliginiń tórtinshi kezeńine deıin jetse, 2020 jyly «US Open» dodasynyń shırek fınalynda oınady. Bes ret Rolan Garrostyń úshinshi aınalymynda óner kórsetti. Osydan bes-alty jyl buryn Borna álemdik reıtıngte 12-orynǵa deıin kóterilgen. Qazirgi kezde ol 37-satyǵa turaqtady.