Memleket basshysy Úkimettiń keńeıtilgen otyrysynda agroónerkásip keshenine aýqymdy reforma jasap, jańa tehnologııalardy engizip, jerdi jáne basqa resýrstardy utymdy paıdalanyp, jeńildikter men sýbsıdııalardyń tıimdiligin arttyrý qajet ekenin aıtty, dep habarlaıdy Egemen.kz.
«Munyń bári, túptep kelgende, aýyl sharýashylyǵyndaǵy eńbektiń ónimdiligin arttyrady, ıaǵnı naqty nátıje beredi. Sý resýrstarynyń qoljetimdi bolýy – agroónerkásip kesheniniń turaqty damýyna tikeleı yqpal etetin mańyzdy faktor. Byltyr Jambyl oblysynyń dıqandary sý tapshylyǵynan qatty zardap shekti. Bıyl da qurǵaqshylyq bolýy múmkin. Arnaıy qurylǵan Sý resýrstary jáne ırrıgasııa mınıstrliginiń jumysy ázirge oıdaǵydaı nátıje bergen joq», dedi Prezıdent Úkimettiń keńeıtilgen otyrysynda.
Sondaı-aq Memleket basshysy kórshi memleketter sý tapshylyǵyn joıý úshin naqty maqsat qoıyp, belsendi jumys istep jatqanyn atap ótti.
«Elimizde sý resýrstaryn basqarý júıesin damytý tujyrymdamasy tek jaqynda ǵana qabyldandy. Bul qujat tym uzaq talqylandy. Ashyǵyn aıtý kerek, jaǵdaı óte kúrdeli. Mysaly, elimizdegi sýarmaly jerdiń 13 paıyzynda ǵana sý únemdeý tehnologııasy bar», dep atap ótti el basshysy.
Prezıdenttiń aıtýynsha, Túrkistan jáne Qyzylorda oblystaryndaǵy jaǵdaı múshkil, qurǵaqshylyq qaýpi asa joǵary.
«Soǵan qaramastan, osy aımaqtarda tıisti jumys júrgizilip jatqan joq. Sondyqtan, sýdy kóp qajet etetin daqyldardy azaıtyp, qurǵaqshylyqqa tózimdi daqyldardy kóbeıtý kerek, sý únemdeıtin tehnologııany engizý qajet. Ahýaldy jaqsartý úshin batyl áreket jasaý kerek. Eń aldymen, sý únemdeý tehnologııasyn keń aýqymda engizgen jón. Shyny kerek, biz sýdy tym orynsyz jumsaımyz. «Sýdyń da suraýy bar». Búkil el bolyp sýdy únemdep paıdalaný mádenıetin qalyptastyrýymyz kerek. Kórshi memleketterdiń tájirıbesin zerttep, tıimdi tustaryn alý qajet. Eldi sýmen qamtamasyz etý – asa mańyzdy mindet, ulttyq qaýipsizdik máselesi deýge bolady. О́nerkásipte, agrosektorda, kommýnaldyq sharýashylyqta, jalpy, barlyq salada sýdy tıimdi paıdalaný máselesine erekshe mán berý qajet», dep túsindirdi Q.Toqaev.