Bıyl qysta elikter Pavlodar qalasyn jıi jaǵalap júr. О́zen mańaıyndaǵy jaıylmalardy mekendeıtin janýarlar keıbir sátte qala kóshelerin kezip, azyq izdeıtinge uqsaıdy.
Ertis ózeniniń jaıylmasynda búginde shamamen 1 360 elik bar dep esepteledi. Memlekettik tabıǵı qaýmalda ańshylyq jasaýǵa tyıym salynǵan. Ormandy jerlerdiń kóbinde qar sonshalyqty qalyń emes. Elikterdiń tebindep jaıylýyna múmkindik mol. Deıturǵanmen turǵyndar janýarlardyń shahardy jıi úıirsekteı bastaǵanyn túsine almaı dal.
Orman sharýashylyǵy jáne janýarlar dúnıesi aýmaqtyq ınspeksııasynyń basshysy Rýslan Tólepbaevtyń sózinshe, «Ertis jaǵalaýy» tabıǵı qaýmaly 2017 jyldan bastap memlekettik mártebege ıe bolǵaly bul jerlerde jabaıy janýarlardyń sany eselep ósip keledi. Ańshylyqqa tyıym salynǵany sebepti elikter, ózge de túz taǵylary erkinsip, qalaǵa jıi kelgishteıdi.
– Elikter kóbine ózen boıyndaǵy toǵaılar arasyn mekendeıdi. Ashyq alańqaılarda, oıpań jerlerde qar qalyń túsip, tebindeýine kedergi keltirip jatýy ǵajap emes. Qalaǵa azyq izdep kelip júrgen bolýy kerek. Jalpy, bul jaǵdaı byltyrdan beri baıqalyp otyr. Buǵan qosa jaıylmadaǵy qaýmalǵa erekshe mártebe berilip, ańshylyqtyń kez kelgen túrine tyıym salynǵaly janýarlar adamdar turatyn eldi mekenderge qaraı jaqyndaı bastaǵany baıqalady. Qazirgi kúni jaıylma mańaıynda 1 360 elik bar dep esepteledi. Al oblys boıynsha byltyr kúzde bizdiń ormanshylar 4 225 elikti sanady, – deıdi ınspeksııa basshysy.
Jergilikti ormanshylar elikter kóp júretin alańqaılarda 78 ottyq jasap, ár on kún saıyn ol jerlerge janýarlar jeıtin azyq aparyp salady. Ottyqtar kóbine janýarlardyń izderine qaraı qurylady. Ormanshylar bıyl jaıylmadaǵy sútqorektiler úshin 3 tonna shóp, 500 butaqty býma jáne 14 kg tuz daıyndaǵan. Qoryqshylar buǵan qosa myńdaǵan sharshy metr jerdiń qaryn arshyp, elikterdiń ottyqtarǵa kedergisiz jetýine múmkindik te jasap qoıypty.
Jaıylmany elikten ózge aqbóken, jabaıy shoshqa, orman sýsary, janat tárizdi ıt jáne bulan mekendeıdi.
Pavlodar oblysy