4-12 naýryz aralyǵynda áıgili sýretshi Djýzeppe Bossı, ánshi Mına Anna Massını jáne skrıpkashy Ýto Ýnıdiń kindik qany tamǵan Italııanyń Býsto-Arsısıo qalasynda bokstan Olımpııa oıyndarynyń lısenzııalyq týrnıri ótedi.
Atalǵan jarysta Qazaq eli namysyn alty sportshy qorǵaıdy. 51 kg salmaqta 26 jastaǵy túrkistandyq Sáken Bıbosynov qolǵap túıistiredi. Ulttyq quramanyń bas bapkeri Myrzaǵalı Aıtjanovtyń tól shákirtiniń álem chempıony (2021), Olımpııa oıyndary (2021) men dúnıejúzilik dodanyń (2019) qola júldegeri degen ataǵy bar. 57 kg salmaqta Mahmud Sabyrhanǵa senim artylyp otyr. Ol álem birinshiliginde bir altyn (2023) men bir kúmis (2021) medaldi oljalady. Biraq bul tabystarynyń barlyǵyna Mahmud 54 kg salmaq dárejesinde qol jetkizdi. Jańa salmaqqa ótkennen keıin byltyr Azııa oıyndarynda 22 jastaǵy shymkenttik jigittiń joly bolmady. Al osy joly qalaı bolatynyn rıng kórsetedi. 63,5 kg salmaqta taǵy bir Túrkistan oblysynyń ókili Muhammedsabyr Bazarbaıuly sharshy alańǵa shyǵady. Ol áli pálendeı bıik belesterdi baǵyndyra qoıǵan joq. 23 jastaǵy bylǵary qolǵap sheberi osydan birer jyl buryn jastardyń qurlyq birinshiliginde júldeger atandy. El spartakıadasyn utyp, Qazaqstan chempıonatynyń fınalynda óner kórsetti.
71 kg salmaqtaǵy Aslan Shymbergenovtiń qorjynynda Olımpıadanyń júldesinen basqasynyń bári bar. 30 jastaǵy Tarazdyń tarlany 2019 jyly Dúnıejúzilik áskerıler oıyndarynyń jeńimpazy, 2022 jyly Azııa jáne 2023 jyly álem chempıony atandy. Ermek Ertaevtyń shákirti jazǵy Azııadada eki ret jeńis tuǵyryna kóterildi. 2018 jyly Djakartada kúmis alsa, 2023 jyly Hanchjoýdaǵy oıyndardyń jartylaı fınalynda Aslanbekke tóreshilerdiń qııanat jasaǵanyn ózderińiz de kórdińizder.
80 jáne 92 kg salmaq dárejelerinde aǵaıyndy Oralbaılar jarys kórkin qyzdyrady. Astana qalasynyń atynan synǵa túsip júrgen egizderdiń jasy – 23-te. Nurbek – 2023 jylǵy álem chempıony, Aıbek – 2022 jylǵy Azııa birinshiliginiń jeńimpazy. Kezinde ekeýi de jastardyń dúnıejúzilik dodalarynda jeńis tuǵyryna kóterildi. Al +92 kg salmaqtaǵy saıysqa Qazaqstannyń boksshylary qatyspaıdy. Sebebi Qamshybek Qońqabaev Hanchjoýdaǵy Azııa oıyndarynyń fınalyna shyǵyp, kúni buryn Olımpıadanyń joldamasyna ıelik etti. Býsto-Arsısıoda erler 28 lısenzııany sarapqa salady.
Áıelderdiń jarysynda 21 joldama taratylady. Bul básekelerde Alýa Balqybekova (50 kg), Jaına Shekerbekova (54 kg), Rımma Volosenko (60 kg), Natalıa Bogdanova (66 kg) jáne Valentına Halzova (75 kg) baq synaıdy. Qyzdardyń da qorjynynda bir joldama bar. Ony Azıadada 57 kg salmaq dárejesinde óner kórsetken Karına Ibragımova jeńip aldy. Apennın túbeginde barlyǵy 114 memleketten kelgen 668 boksshy kúsh synasady dep kútilip otyr.