Dýlat qana daralandy

Alǵashqy bolyp jasóspirimderdiń Dúnıejúzilik Olımpıadasynyń kúmis júldegeri Talǵat Sháıken jarys joly­nan shyǵyp qaldy. 71 kg salmaqta qol­ǵap túıistirgen ol ara-tura kásipqoı boksta da kúsh synasyp júr. Bul ret­te qan­dasymyzdyń kórsetkishi min­siz: 9 jekpe-jek, 9 jeńis, 5 nokaýt. Biraq kásipqoı men áýes­qoı rıngtiń arasy jer men kók­teı, ekeýi múlde bólek sport túr­leri dep mamandar beker aıtpaıdy ǵoı. Talǵat óziniń ekinshi kezdesýinde grýzııalyq Áskerhan Madıevke jol berdi.

Taǵy alty jerlesimiz shırek fınalda jeńilis tapty. Eń óki­nishtisi, solar­dyń úsheýi bitispes qarsylasymyz ózbek­terden utyldy. Atap aıtsaq, Rýslan Kúzeýbaev (60 kg) álem men Azııa chempıony, Azııa oıyndarynyń jeńimpazy Ábdimálik Halokovqa, Erasyl Tańkaı (63,5 kg) Adhamjon Muhıddınovke jáne Nurqanat Raıys (75 kg) Fazlıddın Erkınboevqa ese jiberdi. Dáýlet Mol­dashev (54 kg) álem chem­pıonatynyń eki dúrkin qola júl­degeri, Eýropa oıyn­­darynyń je­ńimpazy, fransııalyq Bıllal Ben­namaǵa jarytyp qarsylyq kórsete alǵan joq. Byltyr dál osy týrnırdiń fına­lynda aı­qasyp, kú­mis me­­dal­dy moınyn­da jar­qy­ratqan Oraz­bek Asylqulovty (57 kg) bul joly mońǵolııalyq Enh-Ama Har­kýý sú­rindirdi. Al ún­dis­tandyq Na­­vın Qu­mar tájirıbeli Ab­zal Qut­ty­bekovke (92 kg) tize búk­tirdi.

Jartylaı fınalǵa úsh jerlesimiz ǵana jetti. Olar – Sanjar Táshkenbaı, Dýlat Bekbaýov jáne Tursynbaı Qu­­lahmet. Bastapqy básekelerde bol­ga­rııalyq Nıkolaı Dıshkov, ózbek Ala­­hon Abdollaev jáne ýkraınalyq Matveı Rajbaǵa san soqtyrǵan 80 kg salmaq dárejesindegi Tursynbaı bul mejede Qytaıda týyp-ósken qan­dasymyz Toqtarbek Tańatqannyń osal tusyn tappady. Nátıjesinde, Qulahmet qola medaldy qanaǵat tut­ty. Toqtarbek – fınalda.

Bas júlde úshin tartysta 51 kg sal­maqtaǵy Sanjar Táshkenbaı fınalda álem chempıonatynyń fınalısi, Azııa oıyndary men chempıonatynyń jeńimpazy, úndilik Amıt Pangalmen aıqasty. Bul jekpe-jek Pangaldyń paıdasyna sheshilip, Sanjar kúmis júldeni qanaǵat tutty. Álem jáne qurlyq chempıony degen ataǵy bar 21 jastaǵy qazaq boksshysy oǵan deıin qyrǵyz Bekzat Er­geshev, moń­ǵol Gan-Erden Ganhýıag jáne ózbek Asylbek Jalılovty jeńgen edi.

Bastapqy kezeńderde kúmánsiz je­ńiske jetken 67 kg salmaqtaǵy Dý­lat Bek­baýov jartylaı fınal­da aljırlyq Ábdenaser Ben­laı­bıden basym túsip, sheshýshi tus­ta Úndistannyń taǵy bir ókili Rad­jatpen kúsh synasty. Bul báse­kede álem chempıonatynyń kúmis júl­degeri óziniń myqtylyǵyn moıyndatyp, bas júldeni qanjyǵasyna baılady. Sondaı-aq Qytaıdyń týy astynda óner kórsetken Toqtarbek Tańatqan da jeńis tuǵyrynyń eń bıik satysyna kóterildi. Qandasymyz fınalda rıng qojaıyny Krıstııan Nıkolovty qapy qaldyrdy. Bul – Qytaı eli bylǵary qolǵap she­ber­leriniń osy jarystaǵy jalǵyz júldesi.

Sóıtip, qorjynynda bir-birden altyn, kúmis jáne qolasy bar Qazaqstan quramasy jalpy esepte besinshi orynǵa taban tiredi. Al­dymyzda – О́z­­bekstan (5+2+5), Úndistan (2+2+2), Bol­garııa (1+4+0) jáne Ýkraınanyń (1+1+3) boks­shylary.