О́zbekstannyń bas shahary Tashkentte aýyr atletıkadan erler men áıelder arasyndaǵy Azııa chempıonaty aıaqtaldy. Atalǵan jarysta qos júldeni oljalaǵan Qazaqstannyń ulttyq quramasy jalpy komandalyq esepte úzdikter qataryna qosyla almady.
Jerlesterimizdiń arasynan tek Aqmolda Saıramkez (67 kg) ben Aleksandr Ývarovtyń (81 kg) jeńis tuǵyryna kóterilýge kúsh-jigeri jetti. Ekeýi de Soltústik Koreıadan kelgen saıypqyrandarǵa ese jiberip, kúmis medaldy moınyna ildi. Kırıll Staroverkınniń de (96 kg) myqtylar sanatynan kórinýge jaqsy múmkindigi boldy. Ol julqyp kóterýde ekinshi oryn alǵanymen, serpe kóterýde osaldyq tanytty. Nátıjesinde, Kırıll tórtinshi satyǵa turaqtady.
Tashkentte Soltústik Koreıa quramasynyń qarqyny óte kúshti boldy. Erlerdiń básekesinde Pang Yn Chol (55 kg), Pak Mıon Djın (61 kg), Rı Von Djý (67 kg) jáne Rı Chong Song (81 kg) qarsylas shaq keltirmeı, bas júldeni oljalady. Osy kórsetkish komandalyq esepte kósh bastaý úshin olarǵa jetkilikti boldy. Qalǵan altyndardy ındonezııalyq Rahmat Ervın Abdýlla (73 kg), ırandyq Álı Álıpýr (89 kg), ońtústikkoreıalyq Von Chon Bıem (96 kg), ózbekstandyq Aqbar Jýraev (102 kg) pen Rýslan Nýrıddınov (109 kg) jáne sırııalyq Man Asaad (+109 kg) ıelendi.
Áıelder saıysynda sarapqa salynǵan 10 bas júldeniń barlyǵyn da Koreıa túbeginiń bıkeshteri jeńip aldy. Soltústikten kelgen Von Hıon Sım (45 kg), Rı Son Kam (49 kg), Kan Hıon Gon (55 kg), Kım Il Gıon (59 kg), Rı Sýk (64 kg), Son Kýk Hıan (71 kg) jáne Chon-Chýn Hýeıdiń (76 kg) shoqtyǵy bıik bolsa, Ońtústiktiń ókilderi arasynda Kım Sý Hıon (81 kg), Iýn Ha Dje (87 kg) jáne Pak He Chjon (87 kg) aldyna jan salmady.