Taıaýda Ázerbaıjan delegasııasynyń jumys sapary sheńberinde yntymaqtastyq máseleleri boıynsha otyrys boldy. Ázerbaıjannyń Sıfrlyq damý jáne kólik mınıstrligi men Qazaqstannyń Kólik mınıstrligi arasyndaǵy teńiz kemeleri ekıpajy músheleriniń kásibı dıplomdaryn ózara taný, ruqsattar kvotasyn (úshinshi elder úshin ruqsat) ulǵaıtý, Quryq portynda teńiz túbin tereńdetý jumystaryn júrgizý qajettiligi, sondaı-aq tıeýdi júzege asyratyn lokomotıvter sanyn kóbeıtý týraly kelisim jobasyna qatysty máseleler talqylandy.
Taraptar 2022-2027 jyldarǵa arnalǵan Qazaqstan, Ázerbaıjan jáne Túrkııa aýmaqtary boıynsha «tar» oryndardy sınhrondy joıý jáne orta dálizdi damytý boıynsha qol qoıylǵan Jol kartasyn júzege asyrý sheńberinde atqarylatyn jumystardy taǵy bir ret pysyqtady.
«2023 jyly Aqtaý jáne Quryq teńiz porttary arqyly aýystyryp tıeý kólemi 65%-ǵa artyp, 2,76 mln tonna júkti qurady. «Tar» oryndardy sınhrondy joıý jáne Transkaspıı halyqaralyq kólik marshrýtyn damytý boıynsha Jol kartasyn iske asyrý sheńberinde dálizdiń qýatyn keńeıtý aıasynda eki tarap ta belsendi jumys júrgizip jatyr. Jol kartasyn ózektendirý boıynsha ýaǵdalastyqqa qol jetkizildi», dedi Temirjol jáne sý kóligi komıteti tóraǵasynyń orynbasary Qasym Tilepov.