Almatyda aq halatty jandardyń biliktiligi synalǵan oqys oqıǵa oryn aldy. Almaty qalalyq Balalar shuǵyl medısınalyq kómek kórsetý ortalyǵynyń (BShMKKO) reanımasııalyq brıgadasyna eki jasar balaǵa ózderi barýǵa týra keldi.
Úı men jumys arasyndaǵy qarbalas ýaqytta jedel járdem brıgadasy tunshyǵyp jatqan balany balalar aýrýhanasyna alyp bara jatady. Sábıdiń jaǵdaıy tipti nasharlaı bastaǵanda dárigerler ýaqytty bosqa ótkizbeı, jaqyn jerdegi Qazybek bı kóshesindegi Qalalyq jedel shuǵyl kómek kórsetý aýrýhanasyna (QJShKKA) aparýdy uıǵarady.
Bala birden osy aýrýhananyń jansaqtaý bólimine jatqyzylyp, reanımatologtar Geımlıh tásilin qoldanyp, ishtegi bóten zatty alyp tastaýǵa birneshe ret árekettengenimen, ókinishke qaraı, nátıje bolmaǵan.
QJShKKA dırektorynyń orynbasary Ermek Jeldibaevtyń aıtýynsha, kishkentaı naýqastyń ómirin aman alyp qalý barysynda ujym tyǵyryqqa tirelgen. Eresekter aýrýhanasynda balalarǵa arnalǵan bronhoskoptyń bolmaýyna baılanysty, oǵan bronhoskopııa jasaý múmkin emes edi.
Alaıda balanyń jaǵdaıy nasharlap, satýrasııasy tómendep, kógere bastaǵan soń reanımatologtar Nurlan Rsalıev, Mamyrjan Iýldashev jáne hırýrg Baqtııar Galıev shuǵyl túrde ıntýbasııa jasady. Intýbasııa kezinde balanyń tynys joldary ashylyp, osydan keıin ǵana balalar aýrýhanasynan dárigerler jetkenshe onyń jaǵdaıyn turaqtandyrýǵa múmkindik týdy.
BShMKKO mamandary kelgennen keıin bronhoskopııanyń kómegimen balanyń tynys jolyna turyp qalǵan burshaq alyndy. Kishkentaı ǵana pasıenttiń jaǵdaıy QJShKKA jansaqtaý bóliminde birneshe saǵattan soń qalpyna kele bastaǵannan keıin, odan ári qaraı emdeý úshin Balalar shuǵyl medısınalyq kómek kórsetý ortalyǵyna jetkizildi.
«Burshaqty shyǵaryp alý ońaı emes, bul negizinen bronhoskopııa kómegimen jasalady. Balalar aýrýhanasynyń mamandary kelgenge deıin bizdiń dárigerler der kezinde áreket jasap, oǵan qosa Balalar aýrýhanasynyń dárigerleriniń «eresekter» aýrýhanasy jaǵdaıynda kásibı túrde jasalǵan bronhoskopııanyń arqasynda bala aman qaldy. Bárimiz sábıge alańdap, onyń jaǵdaıyn jiti qadaǵalap otyrdyq, qazir úıge shyǵarylǵanyn estip qýanyp jatyrmyz», deıdi dáriger Ermek Jeldibaev.
Balalar aýrýhanasy qabyldaý bóliminiń meńgerýshisi Meıirjan Qurmanalıev mundaı eresekter men balalar aýrýhanalary mamandary shuǵyl túrde naýqasty qosyla qutqaratyn oqıǵalar jylyna 2-3 ret qaıtalanatynyn aıtady.
Osy oqıǵaǵa baılanysty Balalar shuǵyl medısınalyq kómek kórsetý ortalyǵynyń bólim meńgerýshisi Meıirjan Qurmanalıev: «BShMKKO qabyldaý bólimine «103»-ten: «Naýqas 2 jasta, aspırasııalyq sındrom, reanımasııalyq brıgadany daıyndańyz» dep qońyraý shalyndy. Qabyldaý bóliminde 7 mamannan turatyn brıgada kútip otyrǵan. Shamamen 30 mınýt ótti, balany áli jetkizbedi: «Bizge jetkizýge ýaqyty bolmady ma?!», «Bala aman ba?» degen suraqtar týyndady. Biz «103»-ke ózimiz qońyraý shaldyq, olar naýqasty jaqyn mańdaǵy basqa aýrýhanaǵa aparýdy uıǵarǵan eken – ýaqyt ótip jatty. Komanda tez jınalyp, 15 mınýt ishinde QJShKKA-ǵa jetti. Kelgennen keıin bizdiń top bronhoskopııa jasap, tynys alý joldarynan burshaqty shyǵaryp tastady. Eki aýrýhananyń jedel áreketiniń arqasynda sábı aman qaldy», deıdi.
BShMKKO dárigerleri tek bıylǵy bir jarym aıdyń ishinde tynys joldarynda bógde zat bar 10 naýqasty aman alyp qalǵanyn aıtý paryz. Bul pasıentterdiń barlyǵy – 1 men 3 jas aralyǵyndaǵy balalar.