Abaı oblysy TJD qutqarýshylary «Qazavtojol» qyzmetkerlerimen birlesip Kókpekti aýdanynda avarııalyq-qutqarý jumystaryn júrgizip jatyr. Onda 100-den astam avtomobıl baǵanasy tur. Qutqarý jumystaryn júrgizý ornyna qosymsha 61 adam jáne 23 tehnıka jiberildi, dep habarlaıdy Egemen.kz.
«Aýa temperatýrasynyń tómendeýi, qatty jel, boranǵa baılanysty avarııalyq-qutqarý jumystaryn júrgizý qıyn bolyp jatyr. ShQO ákimdigi áýe bólimshesiniń MI-8 tikushaǵy qar qursaýynan 29 adamdy, onyń ishinde 3 balany evakýasııalady. Barlyǵy Qalbataý aýylyna jetkizildi. Olarǵa medısınalyq kómek qajet emes. Ýaqytsha jylytý pýnktine ornalastyryldy», delingen TJM baspasóz qyzmetiniń habarlamasynda.
Abaı oblysy TJD bastyǵy Manarbek Shapaǵatov oqıǵa ornynda júr. Jedel respýblıkalyq jáne oblystyq shtab jumys istep tur. Tótenshe jaǵdaılar, Qorǵanys, Ishki ister mınıstrlikteriniń, jergilikti atqarýshy organdardyń kúshteri men quraldary jumyldyrylǵan.
Zardap shekkenderge psıhologııalyq kómek kórsetý úshin Qalbataý aýylynyń «Abaı atyndaǵy kópsalaly mektep - gımnazııasynan» psıholog tartyldy.
«Arnaıy tehnıka men polısııanyń qyzmettik mashınalary trassada turyp qalǵan adamdarǵa áli jete almady. Saǵat 13:15-te MI-8 tikushaǵyndaǵy qutqarýshylar Qalbataý aýylyna 29 adamdy evakýasııalady. Jarma aýdanynyń ákimdigi «Jol bolsyn» kafesinde jylytý pýnktin uıymdastyrdy. Saǵat 13:20-da TJM tikushaǵy ekinshi reıske ketti», delingen Ishki ister mınıstrliginiń habarlamasynda.
Olardyń aıtýynsha, Kókpekti aýdanyndaǵy boranǵa baılanysty ázirge tikushaq qona almaı tur.
Buǵan deıin Abaı oblysynda 100-den astam kólik kepteliste turyp qalǵanyn habarlaǵan edik.