Aýa raıynyń nasharlaýyna baılanysty respýblıkalyq mańyzy bar joldarda engizilgen shekteýlerge oraı Kólik vıse-mınıstri Sátjan Ablalıev úndeý jarııalady, dep jazady Egemen.kz vedomstvonyń baspasóz qyzmetine silteme jasap.
16 aqpan kúni tańǵy saǵat 7-degi jaǵdaı boıynsha elimizdiń 16 óńirindegi avtojoldardyń 100 ýchaskesinde shekteý sharalary engizilgen edi.
«Aýa temperatýrasynyń –350 S deıin tómendeýine baılanysty 80 ýchaskede dızeldi avtokólik quraldarynyń qatyp qalýyn boldyrmaý úshin tıisti shekteýler engizildi. Sonymen birge qalǵan 20 ýchaskede shekteý sharalaryn engizýdiń basty sebebi – kórshiles óńirlerdegi aýa-raıy, boran jáne qar kóshkini qaýpi boldy. Qolaısyz aýa raıyna baılanysty otandastardy arnaıy qyzmetterden keletin habarlamalarǵa nazar aýdaryp, muqııat bolýǵa shaqyramyz.
Sınoptıkterdiń boljamy boıynsha jaqyn kúnderi temperatýranyń –35, –400S-ke deıin tómendeýi kútilýde. Respýblıkalyq mańyzy bar joldarda engizilgen shekteýler áli de saqtalady», dedi vıse-mınıstr.
Keshki saǵat 17:00-degi jaǵdaı boıynsha respýblıkalyq joldardaǵy 28 ýchaskede shekteý sharalary saqtalǵan. Joldardaǵy jumysqa 700-ge jýyq tehnıka men 1500-den astam adam tartylǵan.
Sátjan Ablalıev mamandar aýa raıynyń qolaısyzdyǵyna qaramastan kúsheıtilgen rejımde jumys istep jatqanyn aıtty.