Qazaq kınosynyń qabyrǵaly rejısseri, talantty akter, halyq ártisi Sháken Aımanovtyń 110 jyldyǵyna arnalǵan «Bizdiń súıikti Sháken» atty kınolektorıı jáne kórme ótti.
Sháken Aımanov (Shahkerim) 1914 jyly 15 aqpanda qazirgi Pavlodar oblysynyń Baıanaýyl aýdanynda týǵan. Qazaq óneriniń baǵyna jaralǵan jaryq juldyz, otandyq kıno óneriniń damýyna zor úles qosqan, ómiri parasat pen ónegege órilgen tulǵanyń ǵumyry – búgingi urpaqqa ónege. Ol ulttyq teatr óneri men kıno salasynyń qalyptasyp, damýy úshin búkil ǵumyryn arnady.
Sh.Aımanovtyń rejısserligimen 11 kınofılm túsirilse, taǵy 11 kınotýyndyda ózi akter bolyp oınaǵan. Kıno ónerindegi jarqyn eńbegi úshin KSRO Memlekettik syılyǵymen, Baıseıitova atyndaǵy Qazaq KSR memlekettik syılyǵymen, Lenın, Eńbek Qyzyl Tý, «Qurmet belgisi» ordenderimen marapattalǵan.
Keshte Sh.Aımanov oryndaǵan halyq ánderi shyrqalyp, týyndylary pash etildi. Buqar jyraý atyndaǵy ádebıet jáne óner mýzeıi jınalǵandar nazaryna áıgili jerlesimizge qatysty fotosýretter men jeke zattarynan turatyn kórmeni usyndy.
Is-shara uıymdastyrýshysy Estaı atyndaǵy mádenıet saraıynyń basshysy Sapar Shaıhımovtyń aıtýynsha, Q.Ábýseıitov atyndaǵy mádenı-saýyq ortalyǵynda 15 aqpannan Sháken kınolary tegin kórsetile bastady. Kórermender bir apta boıy «Aldar kóse», «Taqııaly perishte», «Jambyl», «Bizdiń súıikti dáriger», «Biz osynda turamyz», «Dala qyzy», «Án shaqyrady», «Atameken» fılmderin tamashalaı alady.
PAVLODAR