Arqalyq qalasyndaǵy oblystyq qazaq jasóspirimder teatrynda elimizdegi eń bilikti degen teatr synshylarymen tájirıbe almasý aptalyǵy ótti. Birtýar jazýshy, qazaq kórkemsóziniń has sheberi Beıimbet Maılınniń 130 jyldyǵy aıasynda uıymdastyrylǵan is-sharaǵa T.Júrgenov atyndaǵy Qazaq ulttyq óner akademııasynyń teatrtanýshy ǵalymdary qatysty.
Bilikti mamandar shalǵaı óńirdegi óner ujymynyń qoıylymdarymen tanysty. Sondaı-aq jastarǵa aqyl-keńes berip, baǵyt-baǵdar siltedi.
Alataýdyń baýraıynan kelgen bilikti mamandar aptalyqtyń alǵashqy kúni D.Ýrbannyń «Tyshqandar» ertegisi men R.Kýnıdiń «Ázázil aqsha» komedııasyn tamashalap, qoıylymnyń kem-ketigi men unatqan tustaryna toqtalyp, sahna sheberligi, rejıserdiń sheshimi jóninde óz pikirlerin aıtty.
«Búgingi tańda shalǵaıdaǵy teatr ujymy qalaı jumys istep jatyr? Repertýarlyq baǵyty qalaı? Spektaklder qalaı oınalyp jatyr? Mine, biz osyndaı suraqtarǵa jaýap tabý úshin birtalaı jumysty qolǵa alyp jatyrmyz. Jalpy, qazirgi kezde qazaq teatrlary álemdik teatr konteksinde úlken belesti baǵyndyra alatynyn kórsetip otyr. Baǵyt-baǵdarlary da jaqsy. Jastardyń jańa serpinmen alǵa basyp bara jatqany qýantady. Arqalyq qazaq jasóspirimder teatrynyń tynysynan da habardarmyz. Qara shańyraqty ustap otyrǵan óner ujymynyń da eńbegi zor. Alys aımaqtarda óner shańyraǵyn ustap turý úlken jaýapkershilikti talap etedi. О́ıtkeni kadr máselesin sheshý, akterler men rejısserlerdi jumysqa tartý, olardy osynda kelýge qyzyqtyrý, kórermendi baýrap alý – ońaı dúnıe emes. Teatrdyń tamyry búlkildep soǵyp, spektaklder qoıylyp jatyr eken. Endi bul ujymnyń aldynda úlken maqsat tur dep esepteımiz. Bul – óner shyńyna sharyqtap kóterilýge umtylys jasaıtyn teatr báıgelerine qatysý. Biz keıingi on jyl ýaqyt kóleminde únemi respýblıkalyq teatrlar festıvali qazylar alqasynyń múshesi bolyp jumys atqaryp kelemiz. Teatr festıvaldaryna qatysyp, ózderin kórsetse, nur ústine nur bolar edi», deıdi belgili teatr synshysy Baqyt Nurpeıis.
Aptalyq aıasynda Arqalyq teatrynyń ujymy Sh.Aıtmatovtyń «Aq keme», G.Hýgaevtyń «Qara shekpen», Á.Aıtýardyń «Týǵan kúnińizben, anashym!», A.Dýdarevtyń «Kesh» spektaklderin sahnalady.
Qostanaı oblysy,
Arqalyq qalasy