Eńbek kodeksiniń erejelerine ózgertý engizý qajet. Maqsut Narikbayev University janynan qurylǵan Parlament Senatynyń jobalyq keńsesinde ǵalymdar osyndaı bastama kóterdi. Sondaı-aq basqosýda áleýmettik áriptestikti qoldaný aıasyn keńeıtý, ujymdyq kelissózder júrgizýdi ońtaılandyrý, kásipodaq mártebesin nyǵaıtý syndy máseleler talqylandy.
Palatanyń jobalyq keńsesiniń otyrysy ýnıversıtet ǵımaratynda ótti. Basqosýda eńbek salasyndaǵy ujymdyq qatynastardy retteý týraly zań jobasy talqylandy. Ǵalymdardyń aıtýynsha, elimizde áleýmettik áriptestik jáne tatýlastyrý rásimderi ınstıtýttary is júzinde tıimsiz. Ári kásipodaqtardyń álsizdigi jáne jumysshylar men jumys berýshiler arasyndaǵy qazirgi ózara is-qımyl eńbek janjaldarynyń aldyn ala almaı otyr. Jıynda Senat tóraǵasynyń orynbasary Jaqyp Asanov daýlar men mıtıngilerdiń negizgi sebepteriniń biri eńbek qatynastary salasyndaǵy problemalar ekenin atap ótti.
«Memleket basshysy elimizdiń baǵytyn ádiletti Qazaqstan – barshaǵa arnalǵan ádilettilik qaǵıdasymen belgilegen bolatyn. О́mir súrý sapasyn jaqsartý jóninde osy baǵytta kóptegen is-shara qabyldandy. Degenmen azamattardyń eńbek quqyqtaryn qorǵaýdy uıymdastyrý máseleleri áli de aqsap tur. Ádette, jumysshylardyń quqyqtary men zańdy múddesine ádiletsiz qaraý – olardyń ujymdyq narazylyǵynyń basty sebebi. Eńbek kodeksiniń erejeleri árdaıym durys jumys isteı bermeıdi. Sondyqtan jekelegen jaǵdaıdy sheshý úshin ǵana emes, turaqty ujymdyq ádiletti eńbek kelisimin jasasýǵa jumys isteıtin tıisti tetik kerek», dedi J.Asanov.
Is-shara barysynda ýnıversıtet professory jáne zań jobasyn ázirleýshilerdiń biri Múslim Hasenov «Qazaqstan Respýblıkasynyń keıbir zańnamalyq aktilerine eńbek salasyndaǵy ujymdyq qatynastardy retteý máseleleri boıynsha ózgerister men tolyqtyrýlar engizý týraly» zań jobasy týraly aıtyp berdi.
«Qyzmetkerler men jumys berýshiler arasyndaǵy áleýmettik dıalogti nyǵaıtýǵa, táýelsiz kásipodaq qozǵalysyn damytý jáne eńbek mártebesin arttyrý qajettigine basa nazar aýdarylyp otyr. Zań jobasynda birqatar negizgi ózgerister usynyldy. Onyń ishinde ujymdyq kelissózder júrgizý úderisin jeńildetý, eńbek daýlaryn sheshý tetikterin jaqsartý jáne ereýilge qatysty naqty kepildikter berý de bar», dedi ol.
Qatysýshylar is-shara barysynda zań jobasyndaǵy Eńbek týraly ulttyq baıandamasyn engizý týraly usynystaryn ortaǵa saldy. О́ıtkeni elimizde eńbek salasyndaǵy memlekettik saıasatty aıqyndaıtyn jáne eńbek qatynastarynyń jaı-kúıin egjeı-tegjeı taldaıtyn biryńǵaı qujat joq. Demek Eńbek týraly ulttyq baıandama eńbek qatynastary, zańnamany jetildirý jáne quqyqtyq praktıkada sheshimder qabyldaýdyń basty kózi bolady. Osylaısha, qoǵam men memleketti áleýmettik-eńbek qatynastarynyń jaı-kúıi týraly obektıvti jáne senimdi aqparatpen qamtamasyz etedi.
«Biz buǵan baılanysty Senat janynan jumys tobyn quramyz. Ári qaraı jumysshy toptyń aldyna shyǵaryp, ózekti máselelerin talqylap, osy jańa zań jobasy boıynsha jumystardy tereńdetemiz. Keıin Senattyń qabyldaýyna, qaraýyna jetkizemiz», dedi Senat depýtaty Rýslan Rústemov.
Eńbek salasy respýblıkanyń áleýmettik-ekonomıkalyq júıesindegi ózekti jáne strategııalyq mańyzdy baǵyt bolyp esepteledi. Keıingi ýaqytta eldiń keı óńirlerinde eńbek daýlary bolyp, arty ereýilge ulasqanyn eskersek, jańa zań jobasynyń mańyzy erekshe.
Aıta keteıik, búginde respýblıkadaǵy ár úshinshi turǵyn (6,9 mln) – jaldamaly qyzmetker. Al jumyspen qamtylǵan adamdar sany el halqynyń jartysyna jýyǵyn quraıdy (9,1 mln).