Parıj jazǵy Olımpıada oıyndarynyń bastalýyna 158 kún qaldy. Memleket basshysynyń tapsyrmasy aıasynda qurylǵan Olımpıada oıyndaryna daıyndyq shtaby óz jumysyn jalǵastyryp, medal oljalaıdy degen sportshylardyń daıyndyǵyn talqylady, dep jazady Egemen.kz Týrızm jáne sport mınıstrliginiń baspasóz qyzmetine silteme jasap.
Týrızm jáne sport mınıstrliginiń Sportty damytý dıreksııasy men QR Ulttyq Olımpıada komıteti ókilderimen birikken kezdesý ótti.
Jıyn barysynda birqatar máseleler talqylandy. Búginde Qazaqstan quramasynyń qorjynynda sporttyń 8 túri boıynsha 19 joldama bar (sadaq atý - 4, tas joldaǵy velosport - 3, nysana kózdeý - 5, qazirgi bessaıys - 2, boks - 2, grek-rım kúresi - 1, erkin kúres - 1, sporttyq gımnastıka - 1).
Jospar boıynsha 25 sport túri boıynsha lısenzııalardyń sanyn 90-ǵa deıin jetkizý mindeti tur. Sondaı-aq júldege úmitker 54 sportshydan turatyn tizim jasaqtaldy. Qurama kóshbasshylary ár sport túriniń ereksheligin eskere otyryp, jeke jospar boıynsha daıyndalady. Bir sózben aıtqanda - olar eshteńege muqtaj bolmaıdy. Olımpıada aldyndaǵy testilik jarystarǵa qatysý da mańyzdy ekeni tilge tıek etildi. Ár sport túriniń jarys kestesine sáıkes, komandalardyń Parıjge ushyp barý ýaqyty bekitiledi. Sonymen qatar ulttyq qurama formasynyń dızaıny da bekitilip, ony daıyndaý erekshe nazarda bolatyny aıtyldy.
Mınıstrlik osy jyldyń 17 sáýirinde búkil el boıynsha «Olımpıadaǵa 100 kún» is-sharasyn ótkizip, flesh-mobtar men sporttyq jarystar uıymdastyrylady.
Álemniń 205 elinen 10 myńnan asa sportshy qatysady dep josparlanǵan Parıj jazǵy Olımpıada oıyndary 26 shilde men 11 tamyz aralyǵynda ótedi.