Daryndy jastar shetel asyp jatyr

Joǵaryda aıtylǵan sózimiz dáleldi bolý úshin birneshe mysal keltireıik. «Aqsýda» jasyndaı jarqyldaǵan 18 jastaǵy jartylaı qorǵaýshy Ilııas Ábil Portýgalııanyń «Jıl Vısente» klýbymen kelisimshartqa otyrdy. Ázir­ge ol jastar arasyndaǵy jarysta óner kórsetedi. Eger aldaǵy matchtarda Pavlodar fýtbol mektebiniń túlegi ózin jaqsy qyrynan kórsetse, onda Prı­meıra-lıgada «Portý», «Benfıka», «Sportıng», «Braga» sekildi ataqty koman­dalarǵa qarsy oınaıtyny anyq.

Qazaqstan birinshiliginiń ekinshi lı­ga­synda ǵana oınaǵan Dinmuha­med Saıyn­ǵa túrikterdiń kózi tústi. Almatynyń «Akademııa 05» klýbynyń 18 jastaǵy jar­tylaı qorǵaýshysy «Samsýnspordyń» jastar quramasy sapynda alańǵa shyǵyp ta úlgerdi. Belarýs chempıonatynda «Energetık BGÝ» klýby sapynda Ábınur Nurymbet óreli ónerimen kózge tústi. 12 matchta eki márte nysanany dál kózde­gen Tarazdyń tastúlegi alty ret ońtaıly pas berdi. Sodan keıin Ábınur birden Horvatııanyń «Lokomotıvinen» shaqyrtý aldy. Ol da 18 jasta, amplýasy – jartylaı qorǵaýshy.

Joǵaryda esimderi atalǵan fýtbolshylarmen túıdeı jasty atyraýlyq qaqpashy Dýlat Talasbaev «QJ League» jastar lıgasynda óte jaqsy oınady. Segiz kezdesýde 41 seıv jasap, birden kórermenderdiń kózaıymyna aınaldy. Byltyr jyl sońynda ol Danııa birin­shiliginiń ekinshi dıvızıonynda kúsh synasyp júrgen «Hegege» aýysty.

19 jastaǵy «Jetisýdyń» jartylaı qorǵaýshysy Davıd Esimbekovke Novorossııskiniń «Chernomores» klýby «quda tústi». Qazirgi kezde Qara teńizdiń jaǵalaýynda jasaqtalǵan komandanyń jaǵdaıy máz emes. Olar Reseıdiń birinshi lıgasynda eń sońǵy oryndy qanaǵat tu­typ tur. Bálkim, Davıd sekildi daryn ıesi «Chernomorestiń» oıynyna jańa lep pen tyń serpin ákeledi degen úmit bar.

Kezinde Islam Chesnokov pen Vla­dıslav Vasılev syndy tanymal fýtbolshylar sheberlikterin shyńdaǵan, bul kúnderi Denıs Mıtrofanov erkin oıqastap júrgen Belarýstiń «Isloch» klýbyna 19 jastaǵy «Qaırattyń» qyrany Mıras Kóbeev aýysty. Maman­dardyń aıtýynsha, ol – ámbebap oıynshy. Qandaı pozısııaǵa qoısa da, ózine júktelgen mindetti abyroımen atqarýǵa Kóbeevtiń qarym-qabileti jetedi. Sondyqtan da bul jigit úshin «Isloch» kezekti baspaldaq­tyń biri dep esepteımiz. Dál osy baǵyty­nan jańylmasa, Mıras keleshekte qart qurlyqtyń TOP komandalarynyń biriniń jeıdesin kıetinine kúmáni­miz joq.

Dál sol Belarýske Danıl Ankýdı­nov ta attandy. Qaraǵandyda týyp-ósken 20 jastaǵy jigittiń tańdaýy Mogılevtiń «Dneprine» tústi. Jalpy, Danıl buǵan deıin de biraz sheteldik komandalar­dyń namysyn qorǵady. Atap aıtsaq, Máskeýdiń «Rodına-2», Moldovanyń «Sherıf», Armenııanyń «Van» jáne Lıtvanyń «Djıýgasynda» oınady. Ankýdınovtyń eń úzdik kórset­kishi – 2022 jylǵy Moldova chempıony jáne el kýbogy ıegeri.

Sondaı-aq qazirgi kezde Qazaqstan­nyń taǵy birqatar daryndy aıaqdop sheberi sheteldiń túrli klýbtarynda sy­naqtan ótip jatyr. Biraq olarmen áli kelisimshart jasalǵan joq. Sol sebepti de bul fýtbolshylar jaıynda áńgime aıtýǵa áli erte. Desek te al­da­ǵy ýaqytta jerlesterimiz tanymal komandalar­dyń qataryna qosylyp jat­sa, onda jaǵym­dy jańalyqtarmen bóli­semiz. Osylaı­sha, alys-jaqyn shet mem­leketterde sheberlikterin shyńdap júr­gen otandas­tarymyzdyń qatary kóbeıip keledi. Endi biz olardy Anglııanyń Pre­mer-lıgasy, Ispanııanyń La Lıgasy, Ita­lııanyń A serııasy, Germanııa­nyń Býn­deslıgasy, Fransııanyń 1 lıgasy sekildi TOP dıvızıondardan kórýdi ar­man­daımyz!